რამდენ მედალს ველოდებით პარიზის ოლიმპიადიდან?

დაახლოებით, რამდენი სპორტსმენი შეიძლება გაემგზავროს პარიზში ოლიმპიურ თამაშებზე საქართველოდან? სპორტის რომელ სახეობებში აქვს შანსი ჩვენს ქვეყანას და რამდენ მედალს უნდა ველოდოთ ოლიმპიადიდან? - ამ თემების შესახებ La Gazzetta dello Sport Georgia-სთან საქართველოს ეროვნული ოლიმპიური კომიტეტის პირველმა ვიცეპრეზიდენტმა, პარიზის ოლიმპიურ თამაშებზე საქართველოს ოლიმპიური მისიის ხელმძღვანელმა, ელგუჯა ბერიშვილმა ისაუბრა:

- რომელ სახეობებში და რამდენი ლიცენზიაა, რომელიც ოფიციალურად ჯერ არ დადასტურებულა, თუმცა აქტივშია?

- გარდა დადასტურებული 8 ლიცენზიისა, შეგვიძლია ვთქვათ, რომ აქტივში გვაქვს კიდევ 11 ლიცენზია. მათ შორის, 8 ლიცენზია ძიუდოში, 3 - ძალოსნობაში.

- დაახლოებით, რამდენ ლიცენზიას ველოდებით და სპორტის რომელ სახეობებში გვაქვს კიდევ შანსი ლიცენზიის მოპოვების?

- ჩვენი ვარაუდით, პარიზის ოლიმპიურ თამაშებზე დაახლოებით 30-32 სპორტსმენი გვეყოლება. ველოდებით, რომ ლიცენზიანტები შემოგვემატებიან ძიუდოში (ქალი), ჭიდაობაში, კრივში, ძალოსნობაში (ქალი). იმედია, ოლიმპიურ ლიცენზიას ასევე აიღებენ ჩვენი სპორტსმენები ჩოგბურთში, კანოეში, მძლეოსნობასა და ცურვაში.

- თუ ველოდებით ლიცენზიას ისეთ სახეობაში, რომელშიც აქამდე არასდროს ვყოფილვართ, საქართველოს კალათბურთელთა ნაკრებს ელის სალიცენზიო ტურნირი, გარდა ამ შესაძლებლობისა სხვა სახეობებში რა შანსი გვაქვს?

- დღევანდელი რეალობის გათვალისწინებით, სიურპრიზებს არ ველოდებით ისეთ სახეობებში, რომელთა წარმომადგენლებსაც საქართველოდან ოლიმპიადაზე აქამდე არ უასპარეზიათ. ქართული ოლიმპიური სპორტისთვის ძალიან მნიშვნელოვანი ამბავი იქნება, თუ ჩვენი კალათბურთელები შეძლებენ პარიზის საგზურის მოპოვებას.

- ოლიმპიური დელეგაციის მოლოდინი მედლებთან დაკავშირებით...

- პროგნოზის გაკეთება საკმაოდ რთულია. ჩემი ვარაუდით, ქართველ ოლიმპიელებს აქვთ რეალური პოტენცია, რომ პარიზში 7-8 მედლის მოპოვება შეძლონ.

შეგახსენებთ, XXXIII ოლიმპიური თამაშებს საფრანგეთის დედაქალაქი 26 ივლისიდან 11 აგვისტოს ჩათვლით უმასპინძლებს.