მიუნხენის ბაიერნმა ბუნდესლიგის მიმდინარე სეზონში უკვე გაიტანა 109 გოლი, რაც ამ ჩემპიონატის რეკორდია. დიახ, 2025/2026 წლების ფორმაციის "რეკორდმაისტერს" გერმანიის უმაღლეს დივიზიონში არ ჰყავს ბადალი, მაგრამ მთლიანად ტოპ 5 ლიგის საუკეთესო შედეგამდე ჯერ კიდევ შორია.
პირველ ადგილზე ამ მაჩვენებლით არის ტორინო, რომელმაც სერია ა-ს 1947/1948 წლების სეზონში 123 გოლი გაიტანა. საუბარია იმ ლეგენდარულ გუნდზე სანდრო მაცოლას მამის, ვალენტინოს ლიდერობით, რომელიც გასული საუკუნის 40-იან წლებში ევროპაში საუკეთესო იყო.
ვინ იცის, 1949 წლის 4 მაისს მომხდარი ავიაკატასტროფა რომ არა, "ხარების" დომინირება კიდევ რამდენ ხანს გაგრძელდებოდა. დავუბრუნდეთ ალიანც არენას მკვიდრებს, რომლებსაც "გრანატას" ისტორიული რეკორდის დასამხობად გერმანიის ჩემპიონატში კიდევ 15 ბურთის გატანა სჭირდებათ.
არ არის მარტივი ამოცანა, იმის გათვალისწინებით, რომ ბუნდესლიგის დასრულებამდე სულ რაღაც ოთხი ტურია დარჩენილი. სტადიო ფილადელფიას მკვიდრებს ვენსან კომპანის შეგირდებთან შედარებით ჰქონდათ ის უპირატესობა, რომ კალჩოს იმდროინდელი სეზონი იყო 40-ტურიანი, გერმანიაში კი 34-ია.
რაც შეეხება თანამედროვე ეპოქას, რობერტო კოპერნიკოს გუნდის რეკორდის დამხობასთან ყველაზე ახლოს იყო მადრიდის რეალი, რომელმაც პრიმერა დივიზიონის 2011/12-ის სეზონში 121 ბურთი შეაგდო. როგორც ვხედავთ, ბაიერნი "იჩაგრება" კვლავ, რადგან "სამეფო კლუბს" ტორინოს დასაჩრდილად ჰქონდა 38 შეხვედრა, გერმანულ კლუბს კი როგორც აღვნიშნეთ, 34 თამაში აქვს.
