საქართველოს მორაგბეთა ნაკრების 2025 წლის დასკვნით მატჩისთვის მზადებას აგრძელებს. ბორჯღალოსნები წლის ბოლო შეხვედრაში 22 ნოემბერს, თბილისში, „მიხეილ მესხზე“ ტიერ1-ის გუნდს, იაპონიას უმასპინძლებენ.
ამ თამაშის შედეგს უდიდესი მნიშვნელობა აქვს 2027 წლის მსოფლიო თასის კენჭისყრის წინ, რომელიც 3 დეკემბერს გაიმართება. იმ მომენტისთვის მსოფლიო რაგბის რეიტინგში დაკავებული ადგილების მიხედვით, გუნდები (შეგახსენებთ, მსოფლიო თასზე მონაწილე გუნდების რაოდენობა 24-მდე გაიზარდა) 4 კალათაში განაწილდებიან, პირველ კალათაში 1-6 ნაკრებები მოხვდებიან, მეორეში 7-12, მესამეში 13-18 და მეოთხეში 19-24.
შესაბამისად, კენჭისყრისას ერთ კალათაში მყოფი გუნდები მსოფლიო თასზე ერთ ჯგუფში ვერ მოხვდებიან. 22 ნოემბერს იაპონიასთან გამარჯვების, ან შეხვედრის ფრედ დასრულების შემთხვევაში, საქართველო ჯგუფურ ეტაპზე არ შეხვდება მასპინძელ ავსტრალიას, ფიჯის, შოტლანდიას, იტალიას და უელსს. მესამე კალათიდან მისი პოტენციური მეტოქეები იქნებიან იაპონია, ესპანეთი, ურუგვაი, აშშ, სამოა (მსოფლიო თასის საგზურის მოპოვების შემთხვევაში, დღეს გაირკვევა ბელგიასთან მატჩით) და ჩილე.
მოცემული მომენტისთვის საქართველო რეიტინგში მე-11 ადგილს (74,69 ქულა) იკავებს. მას მოსდევს უელსი (74,23) და იაპონია (72,58) და მნიშვნელოვანია, ბორჯღალოსნებმა აღნიშნული პოზიცია შეინარჩუნონ.
ესეც რომ არა, საქართველოს წელს ტიერ1-ის გუნდი არ დაუმარცხებია და ახლა ამის შესანიშნავი შესაძლებლობა ექნება, ამისათვის კი გულშემატკივრის მხარდაჭერა ესაჭიროება.
შეგახსენებთ, ნოემბერში ბორჯღალოსნებმა უკვე გამართეს ორი შეხვედრა, ბათუმში ჯერ აშშ-ის ნაკრები დაამარცხეს 43:30, შემდეგ კი კანადა 38:17.
რაც შეეხება იაპონიას, მან ბოლო 4 კვირის განმავლობაში ტიერ1-ის გუნდებთან 4 თამაში გამართა და მართალია ოთხივე დათმო, თუმცა უდიდესი გამოცდილება შეიძინა. 25 ოქტომბერს იაპონიას ავსტრალიამ 19:15 სძლია; 1 ნოემბერს სამხრეთ აფრიკამ 61:7 მოუგი; 8 ნოემბერს ირლანდიამ 41:10, ხოლო 15 ნოემბერს უელსმა გაწითლებულ დროზე გატანილი ჯარიმით 24:23 აჯობა.
ბორჯრალოსნები იაპონიას აქამდე 7-ჯერ ეთამაშნენ. განვლილი თამაშებიდან სამი თბილისში, „მიხეილ მესხზე“ გაიმართა, სამჯერ იაპონელებმა გვიმასპინძლეს, ერთი შეხვედრა კი ნეიტრალურ მოედანზე შედგა. მათგან ორი ბორჯღალოსნების გამარჯვებით დასრულდა, 5-ში კი მეტოქემ გაიმარჯვა.
საქართველო - იაპონიის ტესტ მატჩი 22 ნოემბერს, "მიხეილ მესხზე" 16:00 საათზე დაიწყება.
შეგახსენებთ, მსოფლიო რაგბიმ ახალი ტურნირი დაამტკიცა, რაც იმას ნიშნავს, რომ ტესტ მატჩებზე საქართველო ტიერ1-ის ნაკრებებს ვეღარ შეხვდება.
ფოტო: საქართველოს რაგბის კავშირი
