ჯაბა კანკავას გაცხადებასთან დაკავშირებით, საქართველოს ეროვნული ნაკრების მთავარი მწვრთნელი ვილი სანიოლი განცხადებას დღის განმავლობაში გააკეთებს.
როგორც La Gazzetta dello Sport Georgia-ს საქართველოს ფეხბურთის ფედერაციაში განუცხადეს, დღეს ასევე ცნობილი გახდება იმ ფეხბურთელის ვინაობა, რომელიც ჯაბა კანკავას ნაცვლად იქნება გამოძახებული ეროვნულ ნაკრებში.
საქართველოს ეროვნული ნაკრების ყოფილი კაპიტნის, ჯაბა კანკავას ჩანაცვლება მას შემდეგ გახდა საჭირო, რაც კანკავამ დღეს განაცხადა, რომ ევროპის ჩემპიონატზე არ მიდის.
ჯაბა კანკავას განცხადება:
"საქართველოს ნაკრების ევროპის ჩემპიონატზე დებიუტამდე რამდენიმე კვირა რჩება. მინდა, რომ ჩვენმა გუნდმა გერმანიაში მაქსიმალურად კარგი შედეგი აჩვენოს და კიდევ ერთხელ იზეიმოს ქართველ გულშემატკივართან ერთად, როგორც ეს 26 მარტს თბილისში იყო. მიხარია, რომ პლეიოფის ნახევარფინალსა და ფინალში გუნდთან ერთად ვიყავი და ამ ისტორიული გამარჯვების მონაწილე გავხდი.
თუმცა, მინდა ჩემი გადაწყვეტილების შესახებ გითხრათ, რომელიც მარტის თამაშების შემდეგ მივიღე: სანაკრებო გამოძახების შემთხვევაში, ევროპის ჩემპიონატზე არა როგორც მოთამაშე, არამედ რიგითი გულშემატკივრის სტატუსით გავემგზავრებოდი.
ძალიან დიდი მადლობა მინდა ვუთხრა სამწვრთნელო შტაბს იმ ნდობისთვის რომელიც მარტში გამომიცხადეს, მაშინ როცა ყველას ერთად ყოფნა და ისტორიულ ჩემპიონატზე გასვლა მთავარი მიზანი იყო. ასევე მადლობა იმ ნდობისთვის რაც ახლაც დავიმსახურე, როგორც სამწვრთნელო შტაბს, ისე გულშემატკივარს, რომლისგანაც ძალიან დიდი მხარდაჭერას ვგრძნობ.
გერმანიაში ნაკრებს მეც, როგორც გულშემატკივარი ისე დავუდგები მხარში და წარმატებებს ვუსურვებ იმ 26 ფეხბურთელს, რომელიც საქართველოს სახელის დაცვას გერმანიის სტადიონებზე შეეცდება. 🇬🇪❤️" - დაწერა ჯაბა კანკავამ ინსტაგრამზე.
შეგახსენებთ, საქართველოს ნაკრები გერმანიაში EURO 2024-ის ჯგუფურ ეტაპზე სამ შეხვედრას გამართავს. 18 ივნისს დორტმუნდში, თურქეთის ნაკრებს დაუპირისპირდება. 22 ივნისს, ჰამბურგში, საქართველოს ნაკრების მეტოქე ჩეხეთი იქნება. ჯგუფური ეტაპის დასკვნით შეხვედრას კი ჩვენი გუნდი 26 ივნისს, გელზენკირხენში, პორტუგალიის წინააღმდეგ გამართავს.
