რეალის 10 ყველაზე დასამახსოვრებელი ფინალი ჩემპიონთა ლიგაზე

ჩემპიონთა თასის პირველი გათამაშება, რომელიც რეალის ტრიუმფით დასრულდა. მოწინააღმდეგე იყო რეიმსი, რომელიც უხვგოლიან შეხვედრაში იქნა დამარცხებული. აღსანიშნავია, რომ მატჩის მე-10 წუთისთვის მადრიდელები აგებდნენ 0:2-ს, მაგრამ ექტორ რიალის დუბლით, ასევე ალფრედო დი სტეფანოსა და მარკიტოს ალონსოს თითო ბურთით მატჩი საბოლოოდ 4:3 დასრულდა.

რეალის ზედიზედ მესამე ჩემპიონობა, ფინალში მილანი იქნა დამარცხებული. მოქმედი ჩემპიონი შეხვედრის მიმდინარეობისას აგებდა ორჯერ (0:1, 1:2), მაგრამ ორივე შემთხვევაში ესპანელებმა მოახერხეს თამაშში დაბრუნება და 107-ე წუთზე საბოლოო წერტილის დასმა. მატჩის გმირი გამოდგა ლეგენდარული პაკო ხენტო, რომელმაც მადრიდელების ტიტულების კოლექცია კიდევ ერთი თასით შეავსო.

ფინალი, რომელშიც 10 (!) გოლი გავიდა. მართალია, რეალმა გაუშვა სამი გოლი, თუმცა დი სტეფანოს ჰეტ-ტრიკმა და პუშკაშის პოკერმა აინტრახტის ეფექტური თამაში მთლიანად გადაფარა. ზოგადად, მადრიდელებს გერმანულ კლუბებთან აკავშირებთ ურთიერთდაპირისპირებების საკმაოდ მდიდარი ისტორია და აღნიშნული მატჩი ამის მტკიცებულებაა.

ჩემპიონთა ლიგის ტიტული, რომელიც რეალმა 32-წლიანი პაუზის შემდეგ მოიგო. რთული წარმოსადგენია, თუმცა ესპანური გრანდი თითქმის სამი დეკადის მანძილზე ვერ ახერხებდა დომინირებას. აღნიშნული ტიტული არის ერთგვარი გარდამავალი მომენტი მადრიდელების წარსულსა და მომავალ წარმატებებს შორის.

რეალის უკანასკნელი ჩემპიონთა ლიგის ტიტული ფლორენტინო პერესის მოსვლამდე და გალაქტიკოსების ეპოქის დაწყებამდე. ფინალში განადგურებული იქნა ვალენსია, რომელმაც მათზე ტიტულოვან მადრიდელებს ვერაფერი მოუხერხა. რამდენიმე თვის შემდეგ, კლუბის პრეზიდენტად დაინიშნება პერესი, რის შემდეგაც "სამეფო კლუბის" კურსი და ხედვა სამუდამოდ შეიცვლება.

ფინალი, რომელიც ზუსტად ასახავს, თუ რას ნიშნავს გალაქტიკოსობა. ლევერკუზენი მთელი სეზონის განმავლობაში იყო ძალიან ეფექტური, თუმცა რეალის ვარსკვლავური შემადგენლობის წინააღმდეგ იმ სეზონში ყველა უძლური იყო. საღამოს მშვენება: ზინედინ ზიდანის ულამაზესი და გამარჯვების მომტანი ბურთი.

12 წლიანი პაუზის შემდეგ, კარლო ანჩელოტიმ მოახერხა რეალის ფინალში გაყვანა. მეტოქე კარგად ნაცნობი ატლეტიკო იყო. პირველ ტაიმში დაცვითი ფეხბურთი ვიხილეთ, მაგრამ 36-ე წუთზე ატლეტიკო წინ გავიდა, დიეგო გოდინმა მოახერხა გოლის გატანა, ტაიმი ატლეტიკომ მოიგო. მეორე ნახევარში დიეგო სიმეონემ თამაში უფრო ჩაკეტა, მაგრამ ბოლო წუთებზე სერხიო რამოსმა შანსი არ დაუტოვა ტიბო კურტუას, 1-1. დამატებით დროში "თეთრ-წითლები" გადაიღალნენ და გატყდნენ: ბეილმა, მარსელომ და რონალდუმ 3 უპასუხო გოლი გაიტანეს.

2017 წელს ჩემპიონთა ლიგის ფინალში სუპერ კლასიკა გველოდა, აფიშა მართლაც ნოსტალგიური იყო - კვლავ მადრიდის რეალი, მისი მეტოქე კი ტურინის იუვენტუსი იყო. შეხვედრა თანაბრად დაიწყო, მაგრამ 20 წუთზე რონალდუმ მოახერხა გოლის გატანა და რეალის წინ გაყვანა, მაგრამ ესპანელები დიდხანს არ იყვნენ წინ: მანჯუკიჩმა შედევრალური მაკრატელა გაიტანა და ანგარიში გაათანაბრა. მეორე ტაიმი წარიმართა მადრიდელთა სრული დომინაციით: 3 გატანილი ბურთი და "სამეფო კლუბის" მიერ კიდევ ერთი მოგებული ფინალი, ანგარიშით 4:1.

2018 წელს პარიზული ფინალის მსგავსად, რეალი ლივერპილს ხვდებოდა. შეხვედრა დაძაბულ ვითარებაში წარიმართა. პირველ ტაიმში სერიო რამოსთან შეჯახების მერე მოჰამედ სალაჰმა მხირს ტრამვა მიიღო და მოედნის დატოვება მუწია. მეორე ტაიმის დებიუტში ლორის კარიუსმა შეცდომა დაუშვა და კარიმ ბენზემამ დააწინაურა კარლო ანჩელოტის გუნდი. "წითლებმა" სადიო მანეს გოლის წყალობით 4 წუთში აღადგინეს წონასწორობა. 61-ე წუთზე მოედანზე გარეტ ბეილი გამოჩნდა და გამოსვლიდან 2 წუთში ლიგის ფინალების ისტორიაში ერთ-ერთი საუკეთესო გოლი შეაგდო, კარიუსს უბრალოდ შანსი არ ჰქონდა. მოგვიანებით, ბეილმა დუბლიც გაიფორმა. რეალმა თავის ისტორიაში მიჯრით მესამედ მოიგო ევროპის ყველაზე პრესტიჟული საკლუბო ტურნირი.

2022 წელს მადრიდის რეალმა თავისი უკანასკნელი ჩემპიონთა ლიგა მოიგო, საფრანგეთის დედაქალაქ პარიზში სტად დე ფრანსზე ''სამეფო კლუბმა'' იურგენ კლოპის ლივერპული დაამარცხა. ტიბო კურტუამ კარიერის ერთ-ერთი საუკეთესო შეხვედრა ჩაატარა. ბელგიელი შეხვედრის საუკეთესო მოთამაშედ დასახელდა, ერთადერთი გოლი კი ფედე ვალვერდეს პასით ვინისიუს ჟუნიორმა გაიტანა და მადრიდის რეალს მეთოთხმეტე ჩემპიონთა ლიგის თასი მოუტანა.