გურამ კაშიას საკმაოდ ნაყოფიერი კვირა გამოუვიდა. ვეტერანმა ცენტრალურმა მცველმა თავდაპირველად კონფერენს ლიგაზე გაუტანა რაიო ვალეკანოს, რამდენიმე დღის შემდეგ, უკვე სლოვაკეთის ლიგაში, მიხალოვცეს. დავუბრუნდეთ ქართველი უკანახაზელის პერფომანსს ევროთასებზე, რომელიც შეიძლება ითქვას, რომ ისტორიული გამოდგა.
მადრიდული გუნდის კარში გატანილი გოლის მომენტისთვის ბრატისლავას სლოვანის ცენტრალური მცველი იყო 38 წლის, 4 თვისა და 23 დღის, რითაც ის კონფერენს ლიგის მიმდინარე სეზონის ყველაზე უხუცეს გოლის ავტორებს შორის მე-2 პოზიციაზე არის. "ლურჯების" მე-4 ნომერზე წინ მხოლოდ ლეგენდარული ედინ ჯეკო იმყოფება.
ბოსნიელი თავდამსხმელი ვენის რაპიდის კარში გატანილი გოლის მომენტისთვის 39 წლის, 7 თვისა და 6 დღის იყო. აღსანიშნავია ისიც, რომ ფლორენციის ფიორენტინას ფორვარდი ზოგადად არის კონფერენს ლიგის ისტორიაში ყველაზე უხუცესი გოლის ავტორი, კაშია კი მე-4 პოზიციაზე იმყოფება.
როგორც ვხედავთ, კონფერენს ლიგაზე ქართველი ცენტრალური მცველი მეორე ადგილზეა, სლოვაკეთის ჩემპიონატის მიმდინარე სეზონში კი ის ნამდვილად ყველაზე უხუცესი გოლის ავტორია.
