2025 წლის სეზონით, ფორმულა 1-ში ჰიბრიდული ერა სრულდება და მომდევნო წლიდან გუნდები სრულად შიდა წვის ძრავზე და ახალ რეგლამენტზე გადავლენ.
ახალ რეგლამენტთან ერთად, 2026 წლიდან ფორმულა 1-ს კადილაკი შეუერთდება და მე-11 გუნდი გახდება. ამერიკულმა ბრენდმა უკვე მიიღო ოფიციალურ დასტური და სამეფო რბოლებში ჩასართველად სამზადისი დაიწყო.
ეს ყველაფერი არ არის — 2026 წელს შესაძლოა კონტრაქტის მხრივ ფორმულა 1-ის რეკორდიც ვიხილოთ. ასტონ მარტინს მოქმედი მსოფლიო ჩემპიონის, მაქს ვერსტაპენის გადაბირება სურს და მას 264-მილიონიან კონტრაქტს სთავაზობს, რომელიც 3 წელზე იქნება გაწერილი. აღნიშნული ინფორმაცია La Gazzetta dello Sport-მა გაავრცელა.
ახალი არ არის, რომ ასტონ მარტინი 2026 წლისთვის განსაკუთრებით ემზადება და 2025 წლის სეზონის ბოლიდის სათანადო განვითარებაზე უარიც კი თქვა, რითაც ფინანსები და ადამიანური რესურსი მომდევნო წლისთვის გადაისროლა. გარდა ამისა, ბრიტანულმა გუნდმა რედ ბულიდან ლეგენდარული ინჟინერი, ადრიან ნიუი გადაიბირა და მან უკვე დაიწყო ახალ ბოლიდზე მუშაობა.
როგორც ირკვევა, მაქს ვერსტაპენის მეგა კონტრაქტის ფინანსური მხარდაჭერა საკუთარ თავზე საუდის არაბეთის საინვესტიციო ფონდმა აიღო, რომელმაც ასტონ მარტინის აქციების 20% შეიძინა და გუნდის განვითარებაში დიდი რესურსი ჩადებას გეგმავს. აღნიშნულ გარიგებას რეალურს რედ ბულში შექმნილი არეულობა და დაძაბული სიტუაცია ქმნის. გავრცელებული ინფორმაციით, ბაჰრეინის გრან პრის შემდეგ, ვერსტაპენის მენეჯერს და ჰელმუტ მარკოს შორის სიტყვიერი დაპირისპირებაც კი მოხდა, რაც ნიდერლანდელის გუნდიდან წასვლის შანს ზრდის.
ფორმულა 1-ის მიმდინარე სეზონში მაქს ვერსტაპენმა 4 რბოლიდან 1-ის მოგება მოახერხა და 69 ქულით მესამე ადგილს იკავებს. სეზონის სტარტზე ნათლად გამოჩნდა, რომ რედ ბულს პრობლემები აქვს და მაკლარენს საკმაოდ ჩამორჩება. თუ ავსტრიულ გუნდში სიტუაცია არ გამოსწორდა და მაქს ვერსტაპენს მომდევნო სეზონშიც ვერ შესთავაზა საჩემპიონო ბოლიდი, დიდი შანსია 4-გზის ჩემპიონმა რედ ბული დატოვოს.
