ლიგა 1-ის მომავალ სეზონში ვიხილავთ ერთ ძალიან საინტერესო ახალწვეულს, რომელიც საფრანგეთის უმაღლეს დივიზიონს როგორც იქნა აჩუქებს იმას, რაც ამ ჩემპიონატს ასე აკლია. საუბარია დერბის შესახებ, არა რეგიონალურის, არამედ ქალაქურის, თანაც დედაქალაქურის. დიახ, პარის სენ-ჟერმენს ქალაქის საუკეთესო კლუბის წოდებაში პარიზი შეეცილება.
"ლურჯები" არასდროს ყოფილან ფრანგული ფეხბურთის ელიტის წარმომადგენლები და მათი წარმატება პირველ რიგში უკავშირდება ბერნან არნოს ინვესტიციებს, რომელთა მიზანი არის ქვეყანაში პსჟ-სთვის ღირსეული კონკურენტის შექმნა. ფრანგმა ბიზნესმენმა "ლე ბლოს" აქციები შეიძინა 2024 წლის ოქტომბერში და ერთი წლის შემდეგ, კლუბი უკვე ელიტაშია.
საინტერესოა ისიც, რომ "ლურჯ-წითლების" სტადიონს, პარკ დე პრენსსა და პარიზის არენას, სტად ჟან-ბუეს შორის დაშორება სულ რაღაც 15 მეტრია. დიახ, ორი სპორტული კომპლექსი საპირისპირო ქუჩებზეა განლაგებული. რაც შეეხება დედაქალაქური დერბის თარიღს, პირველ წრეში ეს მოხდება 4 იანვარს, მეორეში კი 16 მაისს.
ბოლოს კიდევ ერთი საინტერესო ფაქტი "ლურჯების" შესახებ, ამ კლუბის მთავარი გუნდი თუ აკადემია სხვადასხვა დროს გაუვლიათ ისეთ მოთამაშეებს, როგორებიც არიან ჟერემი მენესი, მამადუ სახო, იბრაჰიმა კონატე, აქსელ დისასი, რაიან აიტ-ნური, მატის ტელი, მანუ კონე, ლოიკ ბადე და სხვები. "ლე ბლოს" რიგებში 3 შეხვედრა ამირან სანაიამაც ჩაატარა.
