საქართველოს საკალათბურთო ნაკრების ახალი გამოწვევა, ევრობასკეტის მოქმედი ჩემპიონის შემდეგ, ევრობასკეტის მოქმედი ვიცე-ჩემპიონი - დღეს ჩვენი გუნდი პლეიოფში უძლიერეს საფრანგეთს დაუპირისპირდება.
როგორ ხვდება საქართველოს ნაკრებ საფრანგეთთან მატჩს?
ევრობასკეტის C ჯგუფის მატჩებს კვიპროსმა უმასპინძლა, მომდენნო ეტაპები კი რიგაში ტარდება. ჩვენი გუნდი ლატვიის დედაქალაქში 5 სექტემბერს ჩავიდა. გუშინ სრული შემადგენლობით რიგაში ივარჯიშა. კალათბურთელებმა ძალების აღდგენა შეძლეს და საფრანგეთთან მატჩს გუნდი ოპტიმალურ ფორმაში ხვდება.
გუნდში არსებული განწყობისა და მეტოქის შესახებ საქართველოს ნაკრების კალათბურთელებმა ისაუბრეს:
თორნიკე შენგელია: „კმაყოფილები ვართ, რომ პლეიოფში ვთამაშობთ, მაგრამ ამით არ უნდა დავკმაყოფილდეთ. ყველამ ვიცით, საფრანგეტი მსოფლიოში ერთ-ერთი საუკეთესო გუნდია, თუმცა ესპანეთთანაც დავამტკიცეთ, რომ ასეთ გუნდებთან თამაში შეგვიძლია. საფრანგეთი გამოირჩევა სწრაფი თამაშით, კარგი უკანა ხაზი ჰყავს. ჩვენი ძლიერი მხარე ფარქვეშ თამაში იქნება. მედია სამიანებსაც ჩავაგდებთ. ერთიანი ძალებით, საბრძოლო შემართებით გავალთ მოედანზე.”
სანდრო მამუკელაშვილი: “საბრძოლველად გავალთ და ყველას ვუჩვენებთ, თუ რატომ გამოვედით ჯგუფიდან. საფრანგეთი უძლიერესი გუნდია, მაგრამ დარწმუნებული ვარ ერთიანი თამაშით ყველაფერი შესაძლებელია. “
გზა პლეიოფამდე
საქართველოს ნაკრები ევრობასკეტის მერვედფინალში ისტორიაში მეორედ ასპარეზობს. პირველად აღნიშნულ ეტაპზე ჩვენმა გუნდმა 2015 წელს ითამაშა.
შეგახსენებთ, საქართველოს ნაკრებმა ევროპის ჩემპიონატი სენსაციური გამარჯვებით დაიწყო, ესპანეთს 83:69 მოუგო. ხმაურიანი სტარტის შემდეგ, ჩვენმა გუნდმა იტალიასთან 78:62 და საბერძნეთთან 53:94 წააგო. კვიპროსს კი დიდი სხვაობით, 61:93 მოუგო. ჯგუფური ეტაპის ბოლო მატჩი ბოსნია და ჰერცეგოვინასთან 84:76 წააგო და სწორედ საბერძნეთის გამარჯვებაზე იყო დამოკიდებული საქართველოს შემდეგ ეტაპზე თამაში.
საქართველოსთან წაგების შემდეგ, ესპანეთმა სასურველ შედეგს ვერ მიაღწია და ჯგუფური ეტაპი ვერ დაძლია.
საქართველოს ნაკრების ოფიციალური შემადგენლობა ევროპის ჩემპიონატზე:
რატი ანდრონიკაშვილი, კამარ ბოლდუინი, გიორგი ოჩხიკიძე, კახა ჯინჭარაძე, დუდა სანაძე, ალექსანდრე ფევაძე, თორნიკე შენგელია, სანდრო მამუკელაშვილი, ბექა ბურჯანაძე, გიორგი კორსანტია, გოგა ბითაძე, გიორგი შერმადინი.
შეგახსენებთ, საქართველოს ნაკრები ჩვენი ქვეყნის ისტორიაში ზედიზედ, მეექვსე ევრობასკეტზე ასპარეზობს.
საფრანგეთის ნაკრები
საფრანგეთის ნაკრებმა მომდინარე ევრობასკეტზე ჩატარებული 5 მატჩიდან 4 მოუგო. ფრანგებმა პირველ შეხვედრაში ბელგია 64:92 დაამარცხეს, შემდეგ სლოვენიას 103:95 სძლიეს, რასაც ისრაელთან წაგება მოჰყვა 82:69, მეოთხე შეხვედარაში D ჯგუფის მასპინძელ პოლონეთს 83:76 მოუგეს, ყველაზე დიდი სხვაობით კი ჯგუფური ეტაპის დასკვნით შეხვედრაში ისლანდიასთან 114:74 გაიმარჯვეს.
საფრანგეთის ნაკრებმა 2022 წელს ევრობასკეტის ფინალში ითამაშა და 88:76 წააგო ესპანეთთან. ფრანგები ევროპის ჩემპიონობისთვის იბრძვიან, მიუხედავად იმისა, რომ გუნდს ვერ ეხმარებიან ვარსკვლავები - ვიქტორ ვემბანიამა („სან ანტონიო სპურსი“), რუდი გობერი („მინესოტა ტიმბერვულვზი“), ევან ფურნიე („ოლიმპიაკოსი“), ვინსენ პუარე (ეფესი) და მატიას ლესორი („პანათინაიკოსი“) , მატიას ლესორი („პანათინაიკოსი“). ტურნირის მსვლელობისას გუნდს ალექს სარი (ვაშინგტონი) დააკლდა.
დანაკლისის მიუხედავად საფრანგეთი გამოცდილი და ახალგაზრდა კალათბურთელთა ერთიანი ძალისხმევით გუნდურად და წარმატებით თამაშობს. საფრანგეთის ნაკრებში ამჟამად NBA-ის რამდენიმე მოთამაშეა.
საფრანგეთის ნაკრების შემადგენლობა:
ტეო მალედონი („რეალ მადრიდი“), სილვენ ფრანსისკო (“ჟალგირისი”); ნადირ ჰიფი („პარიზი“); ელი ოკობო („მონაკო“); ტიმოტე ლუვავუ-კაბარო (“ბასკონია”); ისაია კორდინიე („ანადოლუ ეფესი“); ზაქარი რისაშერი („ატლანტა ჰოუქსი“); ბილ კლაულიბალი („ვაშინგტონ უიზარდსი“); ჯეილენ ჰოარდი („მაკაბი თელ ავივი“); მუჰამედუ ჯაიტე („დუბაი ბასკეტი“); გერშონ იაბუსელე („ნიუ იორკ ნიქსი“); ალექსანდრ სარი („ვაშინგტონ უიზარდსი“).
მატჩამდე საფრანგეთის ნაკრების მთავარმა მწვრთნელმა, ფედერიკ ფოსომ საქართველოს ნაკრების შესახებ ისაუბრა:
„საქართველოს არ ჰყავს სათადარიგ კალათბურთელები, რომლებიც მოედანზე დიდ დროს გაატარებენ. ეცდებიან ტემპის დაგდებას.
რაც შეეხება მათ გოგა ბითაძესა და სანდრო მამუკელაშვილს, ბითაძე ძლიერია როგორც მოხსნებში, ასევე შეტევაში, კარგად შეუძლია პერიმეტრიდან სროლაც. NBA-ის ამ 2 მოთამაშეს კლუბებსა და ნაკრებში სხვადასხვა ფუნქცია აქვთ. ეროვნულ გუნდში გაცილებით მეტი პასუხისმგებლობა ეკისრებათ და სხვა დონეზე თამაშობენ. კამარ ბოლდუინს დიდ ყურადღებას დავუთმობთ. ამერიკელი კალათბურთელები ევროპულ ნაკრებებში სახიფათოები არიან. საქართველოს ძლიერი კალათბურთელებიც ჰყავს, თუმცა, ვფიქრობ საკვანძო კამარ ბოლდუინია“
საფრანგეთი - საქართველოს მატჩი დღეს თბილისის დროით, 16:15 საათზე დაიწყება. გამარჯვების შემთხვევაში საქართველოს მეტოქე მეოთხედფინალში ფინეთი იქნება, რომელმაც ასპარეზობას სერბეთი გამოთიშა (86:92).
