10 ნოემბერს, ზურიკო ლიონს დაუპირისპირდება, რის შემდეგაც საქართველოში ჩამოფრინდება და ეროვნულ ნაკრებს შეუერთდება. 16 და 19 ნოემბერს, ერთა ლიგის ფლეიოფში ჩვენი ნაკრები უკრაინასა და ჩეხეთს დაუპირისპირდება.
LaGazzetta.ge-სთან ინტერვიუში დავითაშვილმა თავის კარგ ფორმაზე, ნაკრებსა და სხვა თემებზე ისაუბრა.
– პირველ რიგში, შენს ამჟამინდელ მდგომარეობაზე მოგვიყევი. ლიგა 2-ში თამაშობდი და კარგი სეზონის შემდეგ ლიგა 1-ის გუნდში გადახვედი. როგორია შენი თვალით დანახული საფრანგეთის ჩემპიონატი?
– "ლიგა 2-ში ვთამაშობდი, მაგრამ როცა საფრანგეთის უმაღლეს ლიგაში თამაში დავიწყე, მივხვდი, რომ აქ სხვა დონე იყო, უფრო მეტი ტექნიკა და მუშაობა გჭირდება, რათა აქაურ დონეს ალღო აუღო. ზოგადად კი, ჩემი აზრით, თუ არ ივარჯიშებ და არ მოემზადები, რომელ ჩემპიონატშიც არ უნდა იყო, არაფერი გამოგივა."
– სეზონის ცუდი სტარტის შემდეგ, თამაში შედარებით გამოასწორეთ, რაშიც შენი წვლილი დიდია. როგორი გრძნობაა, როცა ისეთი ისტორიული გუნდის ლიდერი ხარ, როგორიც სტ.ეტიენია?
– "რთული პერიოდი გვქონდა. ზოგადად, როცა ცხრილის ქვედა ნაწილში ხარ, თამაშზე გასვლა ყოველთვის რთულია, რადგან შენს თავთან დაძაბული ხარ. ლიდერობას რაც შეეხება, ჩემთვის ეს მოტივაციაა და უფრო მეხმარება იმაში, რომ მოედანზე გავიდე და გუნდს გამარჯვებაში დავეხმარო."
– შენ მიმართ დიდი კრიტიკა იყო. ამბობდნენ ეს ფეხბურთელი როგორ იყიდესო. შენი და კვარას გამორჩეული თვისებაა, რომ როცა კრიტიკას იღებთ, მალევე გოლებს იტანთ და კრიტიკოსებს აჩუმებთ. შენი მისამართით წამოსული კრიტიკის შემდეგაც ასე მოხდა და 5 გოლი გაიტანე...
– "ამ დეტალებს მე და კვარა ყურადღებას ბავშვობიდანვე არ ვაქცევდით. ყველას თავისი აზრი აქვს და როგორც აღნიშნე, ამ კრიტიკის შემდეგ, თამაში უფრო კარგად გამოგვდის ხოლმე. ხოდა, თუ ასეა, მაშინ თანახმა ვარ, ყველა თამაშის წინ გვაკრიტიკონ და შეიძლება უკეთესი შედეგები მივიღოთ (იცინის)."
– რადგან კვარა ვახსენეთ, თქვენს გამორჩეულ ურთიერთობაზე გვესაუბრე.
– "მე და კვარა ერთმანეთს ძალიან კარგად ვუგებთ როგორც მოედანზე, ისე მის გარეთ. ბავშვობიდანვე ახლო ურთიერთობა გვქონდა და ახლაც ასეა. რაც დრო გადის, ერთმანეთს უფრო მეტად ვუგებთ და ასეც გაგრძელდება."
– მოახლოვებულ 2 მატჩში გამარჯვება აუცილებლად გვჭირდება, როგორია მოლოდინი?
– "წინა მატჩები წავაგეთ, მაგრამ ეს წარუმატებელი სერიაც ფეხბურთის ნაწილია. რა თქმა უნდა, ამ ორ შეხვედრაში ჩვენი მიზანი ორივე მატჩის მოგება და გულშემატკივრის კიდევ ერთხელ გახარებაა."
– წინა ორ მატჩში წააგეთ და თქვით, ეს გაკვეთილი იქნება მომდევნო თამაშებისთვისო. რა ისწავლეთ იმ 2 წაგებისგან, რა დაგვაკლდა და რა უნდა შევცვალოთ?
– "არაფერს არ შევცვლიდი. ეს ფეხბურთია და ყველაფერი ხდება ხოლმე. ბოლო თამაშშიც მოსაგებად ვითამაშეთ, მაგრამ ისე არ მოხდა, როგორც გვინდოდა. მთავარია, თამაში იმავე შემართებით და მონდომებით გავაგრძელოთ, როგორც აქამდე და აუცილებლად გავიმარჯვებთ."
– როგორც ვიცით, შენი ყველაზე დიდი გულშემატკივარი მამაა, რომელსაც ასევე დიდი ფეხბურთი აქვს ნათამაშები. ყველა თამაშს უყურებს, ნერვიულობს და გვერდში გიდგას. რა როლი აქვს მას შენს კარიერაში?
– "რომ არა მამაჩემი, შესაძლოა, ფეხბურთელიც არ ვყოფილიყავი. ჩემს კარიერაში მამაჩემის როლი ძალიან დიდია. ბევრი რამ მასწავლა და მისი დარიგებების შედეგად, ის მენტალიტეტი ჩამომიყალიბდა, რომ შრომის გარეშე წარმატების მიღწევა რთულია. ასეთი მიდგომა კი ჩემი კარიერის განვითარებაში ძალიან დამეხმარა".
– ქართველი გულშემატკივრის ერთ-ერთი საყვარელი ფეხბურთელი ხარ, ისინი ყოვეელთვის ბოლომდე გგულშემატკივრობენ და მომავალში შენგან კიდევ მეტ წარმატებას ელიან...
– "ჩემი და მთლიანად ნაკრების მიზანია, რომ ქართველი გულშემატკივრები გავახაროთ. რა თქმა უნდა, მათ მოწოდებაც არ სჭირდებათ, რომ თამაშზე უნდა მოვიდნენ და გვიგულშემატკივრონ, მე და ჩემი თანაგუნდელები კი ყველაფერს გავაკეთებთ, რომ ისევ ისე გავახაროთ, როგორც ეს აქამდე ხდებოდა."
