საქართველოს 15-ქალა მორაგბეთა ნაკრები, რაგბი ევროპის კონფერენს დივიზიონის ფარგლებში, პირველ ოფიციალურ შეხვედრას გამართავს. ქართველი მორაგბეები მომავალ კვირაში რუმინეთში გაემგზავრებიან და 22 ნოემბერს, სნაგოვიში, საქართველოსა და რუმინეთის მატჩი გაიმართება. შეხვედრა თბილისის დროით, 13:00 საათზე დაიწყება.
რადგან რაგბი ევროპა ახლა იწყებს 15-ქალა ტურნირების ორგანიზებას, ფორმატის კუთხით ბევრი რამ გაურკვეველია. გუნდებს არ აქვთ წინასწარ გაწერილი კალენდარი და გუნდები ინდივიდუალურად ათანხმებენ თამაშებს.
საქართველოს 15-ქალა მორაგბეთა ნაკრების მთავარი მწვრთნელის,გიორგი მაისურაძის თქმით, საწყისი ეატაპზე პირველი ნაბიჯების გადადგმა ნიშვნელოვანია ქალთა რაგბის განვითარებისთვის:
„ჯერჯერობით ბუნდოვანი სურათია, რადგან ტურნირის ფორმატიც არ არის გარკვეული, თუმცა როდესაც ახალ საქმეს ეჭიდები პირველი ნაბიჯები უნდა გადადგა და ახლა ჩვენ ამ პროცესს გავდივართ. დაახლოებით 20 წლის წინ 7-ქალამ და დაახლოებით 35 წლის წინ საქართველოს ეროვნულმა ნაკრებმა, სწორედ ასე დაიწყეს თავიანთი წარმატებული ისტორია“.
ჩვენ ვმუშაობთ ქალთა რაგბის განვითარების 3-წლიან გეგმაზე და კონფერენც დივიზიონში ჩართვა, თუნდაც ასეთი ფორმით, გოგონებისთვის დიდი მოტივაცია იქნება. ვფიქრობ, ამ თამაშს ბევრი კუთხით ექნება დადებითი გავლენა.
რაც შეეხება რუმინეთთან მატჩს, სამწუხაროდ მეტოქეზე ვერანაირი ინფორმაცია ვერ მოვიძიეთ. მათ პირველი ოფიციალური შეხვედრა შარშან გამართეს და კონფერენც დივიზიონის ფარგლებში ბულგარეთი დაამარცხეს. ბევრი მცდელობის მიუხედავად ამ შეხვედრის ჩანაწერი ვერსად ვნახეთ. დიდი ალბათობით რუმინეთიც ჩვენი დონის გუნდი იქნება, რადგან ისინიც პირველ ნაბიჯებს დგამენ. განსაკუთრებულ სიურპრიზებს არ ველოდებით და აქცენტი სრულად ჩვენი თამაშის გაუმჯობესებაზე კეთდება.
ვუყურე ჩვენი და ყაზახეთის ნაკრებების თამაშების ჩანაწერს, რამაც გარკვეული დასკვნების გაკეთების შესაძლებლობა მომცა. ვეცადეთ ხარვეზების გამოსწორება როგორც დაცვაში, ასევე შეტევაში. ვარჯიშებზე ბევრი რამ კარგად გამოდიოდა, თუმცა რა იქნება რეალური წნეხის ქვეშ მოედანზე გამოჩნდება. აქამდე გვქონდა მხოლოდ ერთი მართვადი ვარჯიში 18-წლამდე აკადემიის ბიჭებთან, თუმცა ეს შეფასების გასაკეთებლად საკმარისი არაა,"- აღნიშნა გიორგი მაისურაძემ.
საქართველოს რაგბის კავშირი უკვე აწარმოებს მოლაპარაკებას რამდენიმე ქვეყანასთან (ჩეხეთი, ხორვატია, შვეიცარია), რათა მომავალი წლის დასაწყისში ორი თამაში გამართოს, როგორც კონფერენც დივიზიონის ფარგლებში, ასევე მის მიღმა (ამხანაგური თამაში). ასევე აწარმოებს მოლაპარაკებას რაგბი ევროპასთან, რათა 2026 ან 2027 წელს ჩვენი გოგონები რაგბი ევროპის მეორე დივიზიონში, ალაფაში ჩაერთოს, სადაც სისტემა შედარებით გამართულია, ვიდრე კონფერენც დივიზიონში.
