საქართველოს 7-ქალა რაგბის ნაკრებმა ბონის საერთაშორისო ტურნირზე, მეორე სათამაშო დღეს, ერთი გამარჯვება მოიპოვა და მესამე ადგილი დაიკავა.
ქართველებმა გერმანია1-თან 0:32-ისა და ბელგიასთან 10:40-ის შემდეგ, გერმანია2 32:7 დაამარცხეს.ბელგიელებს ლელოები თეონა ჩიტაიშვილმა და ანა პოღოსიანმა გაუტანეს, გერმანია2-თან კი თავი ანა ხაბულიანმა, ანა დათიაშვილმა, მარიამ გოგუაძემ, მანონი საღარაძემ და ანი კაპანაძემ გამოიჩინეს.
ჩვენი 7-ქალა წელს პირველად ითამაშებს რაგბი ევროპის ჩემპიონატზე და მთავარი მწვრთნელის,ჯაბა მალაღურაძისთქმით, გოგონებს ბონში მიღებული გამოცდილება მნიშვნელოვნად დაეხმარება:
„ზოგადად მოგება ყოველთვის მნიშვნელოვანია, თუმცა ამ ეტაპზე ჩვენ სხვა მიზნები გვქონდა და ვფიქრობ, ამოცანას თავი კარგად გავართვით. დიდი ხანია რაგბი7 არ გვითამაშია და მნიშვნელოვანი იყო სათამაშო გეგმის გახსენება, იმ ხარვეზების დანახვა, რომელთა გამოსწორებაზეც დარჩენილ დროში უნდა ვიმუშაოთ. გარდა ამისა, გოგონებს მივეცით სათამაშო დრო, რათა ქონოდათ საკუთარი ძალების წარმოჩენის შესაძლებლობა. ბოლო ერთი წლის განმავლობაში ყველა მათგანს მნიშვნელოვანი პროგრესი აქვს. ვეთამაშეთ გუნდებს, რომლებიც რაგბი ევროპის ჩემპიონატზე ჩვენი კონკურენტები არიან.
ჩემპიონატზე შედეგი მნიშვნელოვანია და ახლა ჩვენი ერთადერთი ამოცანაა მინიმუმამდე დავიყვანოთ შეცდომები. თუ ამას მოვახერხებთ, აუცილებლად გვექნება წარმატება და ეს გასულმა წლებმაც არაერთხელ დაგვანახა. ფიზიკურად, ტექნიკურად და ტაქტიკურად კარგად ვართ მომზადებული, ამ ტურნირმა თავდაჯერებულობა შეგვმატა და მაქვს მოლოდინი, რომ ჩემპიონატში აუცილებლად შევძლებთ ადგილის შენარჩუნებას.
გერმანიიდან გოგონები საფრანგეთში გადაინაცვლებენ და ქალაქ ტურში 5-დღიან შეკრებას გაივლიან. მზადების ფარგლებში ადგილობრივ რეგიონალურ ნაკრებთან ამხანაგური თამაშები იქნება, 24-25 მაისს კი საქართველოს 7-ქალა ტურის ტრადიციულ ტურნირში ჩაერთვება, რომელშიც სხვადასხვა ქვეყნის 16 გუნდი მიიღებს მონაწილეობას. იქ მათ ირმა გულიაშვილი შეუერთდება, რომელიც სარაგბო კარიერას ესპანეთში აგრძელებს.
გერმანიიდან კირა დანელია საქართველოში ბრუნდება. მინდა მას მადლობა გადავუხადო! კირამ თავი საუკეთესოდ წარმოაჩინა და სამომავლოდ საქართველოს ნაკრებს დიდ სამსახურს გაუწევს. მის ნაცვლად 1-წლიანი შესვენების შემდეგ ირმა გულიაშვილი დაგვემატება, რომელსაც რაგბი არ შეუწყვეტია და ესპანეთში რეგულარულად თამაშობდა (რაგბი 15-ს და 7-ს). ახლა ის სანაკრებო სივრცესაც უბრუნდება. ტურში ჩვენი მიზანი შეთამაშება იქნება, რათა სრულ მზადყოფნაში შევხვდეთ ივნისში გასამართ რაგბი ევროპის ჩემპიონატს," - აღნიშნაჯაბა მალაღურაძემ.
7-ქალას შემადგენლობა ბონისა და ტურის ტურნირებზე
სალომე მაკასარაშვილი, თეონა ჩიტაიშვილი, ანა დათიაშვილი, ანი კაპანაძე, ანა პოღოსიანი, კირა დანელია, მანონი საღარაძე, სალომე საღარაძე, მარიამ გოგუაძე, ლიკა ხუფენია, ნინო წიკლაური, ანა ხაბულიანი, ნინო გუგუჩია, მარიამ ბერანძე, ანასტასია ახვლედიანი, ანნა რურუა, ირმა გულიაშვილი.
