26 მარტს საქართველოს ნაკრები ამხანაგურ მატჩს ისრაელის ეროვნული გუნდის წინააღმდეგ გამართავს. ურთიერთდაპირისპირებების ისტორია არის "ლურჯ-თეთრების" მხარეს: 3 მოგება, 2 ფრე და მხოლოდ 1 გამარჯვება "ჯვაროსნების" სასარგებლოდ. სწორედ იმ ერთადერთ მოგებას გავიხსენებთ ჩვენი გუნდის მხრიდან.
ეს მოხდა 2001 წლის 24 აპრილს, ასევე ამხანაგურ მატჩში. რევაზ ძოძუაშვილისა და დავით ყიფიანის მიერ ერთობლივად გაწვრთნილმა გუნდმა "რჩეულთა ნაკრებს" 3:2 მოუგო. მასპინძელთა მხრიდან 2 ბურთი შეაგდო თემურ ქეცბაიამ და შეგახსენებთ იმასაც, რომ ის იმ დროს საქართველოს კაპიტნობდა.
ნიუკასლ იუნაიტედის ყოფილმა შემტევმა ანგარიში გახსნა მეცხრე წუთზე, პირველი ტაიმის მიწურულს კი მან "ჯვაროსნები" წინ კიდევ ერთხელ გაიყვანა. 88-ე წუთამდე იყო ფრე, 2:2, მოგების მომტანი ბურთი ჩვენი ეროვნული გუნდის სასარგებლოდ არჩილ არველაძემ შეაგდო. აღნიშნული შეხვედრის შემდეგ, საქართველოს მოუგებელი სერია ისრაელთან უკვე 3 თამაშს ითვლის.
საინტერესოა ისიც, რომ "ლურჯ-თეთრების" კარში გატანილი გოლები "ჯვაროსნების" იმდროინდელი ცხრიანისა და კიოლნის ყოფილი ფორვარდისთვის ეროვნულ გუნდში უკანასკნელი გამოდგა. ქეცბაია ჩვენს ნაკრებში ითამაშებს 2003 წლამდე, შემდეგ კი საერთაშორისო კარიერას დაასრულებს.
რაც შეეხება საქართველოს ნაკრების იმდროინდელ რვიანს, ხსენებული მატჩის შემდეგ, ის იმავე წელს ასევე გამოჩნდება იტალიასა და უნგრეთთან, აღნიშნული შეხვედრების შემდეგ კი აღარ ითამაშებს. "ჯვაროსნების" შემადგენლობა იყო ასეთი:
გიორგი ლომაია, რევაზ ქემოკლიძე, ლევან სილაგაძე, ზურაბ ხიზანიშვილი (გიორგი ჭანკოტაძე 63'), ვალერი აბრამიძე, გიორგი გახოკიძე (მალხაზ ასათიანი 68'), თემურ ქეცბაია (კ), ალექსანდრე რეხვიაშვილი, გიორგი ქინქლაძე (რატი ალექსიძე 46'), არჩილ არველაძე (ლევან მელქაძე 90'), შოთა არველაძე.
