საკვალიფიკაციო ეტაპის პირველ ტურში, საქართველოს ნაკრები დანიასთან 75:69 დამარცხდა, ხოლო სერბეთმა ფინეთს 77:61 მოუგო და ჯგუფში პირველ ადგილს იკავებს.
დღევანდელი მეტოქეები ისტორიაში ერთმანეთს 6-ჯერ შეხვდნენ, საიდანაც 3 შეხვედრა საქართველომ მოიგო, ხოლო 3 - სერბეთმა:
სერბეთი 71:75 საქართველო: 2013 წელი
საქართველო 68:66 სერბეთი: 2017 წელი
სერბეთი 105:87 საქართველო: 2017 წელი
საქართველო 50:87 სერბეთი: 2018 წელი
სერბეთი 90:94 საქართველო: 2020 წელი
საქართველო 66:92 სერბეთი: 2021 წელი
აღნიშნული მატჩის წინ, საქართველოს ნაკრების უკანახაზელმა, გიორგი ცინცაძემ კომენტარი გააკეთა:
"საპასუხისმგებლო თამაშია, იმედია მაქვს და მჯერა ჩვენს გუნდს შესწევს ძალა, დასანანი მარცხის შემდეგ, გამარჯვება მოვიპოვოთ, რაშიც გულშემატკივარი დაგვეხმარება. სერბეთი ძლიერი გუნდია, კარგი კალათბურთელები ჰყავთ, თუმცა სახლში თამაში ჩვენი პლუსია, ამ დარბაზში ხშირად დაგვიმტკიცებია, რომ ყველა მეტოქესთან შეგვიძლია თანაბრად თამაში და გამარჯვება. რაც შეეხება ჩემს სანაკრებო კარიერას, მოვიდა დრო ნაკრებს დავემშვიდობო და გულშემატკივართა რიგებში გადავინაცვლო. წარმატებებს ვუსურვებ ჩვენს ნაკრებს."
აღნიშნულ მატჩში, გიორგი ცინცაძე სანაკრებო კარიერას დაასრულებს. ის საქართველოს ღირსებას 20 წლის განმავლობაში იცავდა. სერბეთთან მატჩი ცინცაძისთვის 217-ე იქნება, რაც საქართველოს გუნდურ სახეობებში ჩატარებული თამაშებით რეკორდია.
საქართველოს და სერბეთის მატჩი დღეს, 21:00 საათზე, "თბილისი არენაზე" დაიწყება.
