დღეს, საქართველოს საკალათბურთო ეროვნული ნაკრები 2027 წლის მსოფლიო ჩემპიონატის საკვალიფიკაციო ეტაპის პირველ მატჩს თბილისში, უკრაინის ეროვნული ნაკრების წინააღმდეგ ჩაატარებს. ზაფხულში, ევროპის ჩემპიონატზე მიღწეული წარმატების შემდეგ, ალექსანდარ ჯიკიჩის გუნდი ახალი გამოწვევისთვის ემზადება, ამ გამოწვევას კი მსოფლიო ჩემპიონატზე ზედიზედ მეორედ თამაში ჰქვია.
ჩვენმა ნაკრებმა მსოფლიოს ჩემპიონატზე პირველად 2023 წელს იასპარეზა და მუნდიალზე ზედიზედ მეორედ გასვლას საკვალიფიკაციო ტურნირში წარმატების გზით შეეცდება. საქართველოს ჯგუფში ესპანეთი, უკრაინა და დანია ჰყავს, მომდევნო, მეორე ჯგუფურ ეტაპზე კი 3 საუკეთესო გადის. საქართველოს ნაკრები უკრაინასთან ჩატარებული მატჩის შემდეგ, გასვლაზე ესპანეთთან ითამაშებს. ჯიკიჩის გუნდი ამ შეხვედრას 30 ნოემბერს ჩაატარებს.
ზემოხსენებული მატჩებისთვის თბილისში 20 ნოემბერს სანაკრებო შეკრება დაიწყო. მთავარი მწვრთნელის, ალეკსანდარ ჯიკიჩის ხელმძღვანელობით თავდაპირველად სუპერლიგაში მოთამაშე კალათბურთელებმა ივარჯიშეს, ლეგიონერები კი ეროვნულ გუნდს ნელ-ნელა შეუერთდენ.
მიუხედავად იმისა, რომ თორნიკე შენგელიამ გუშინ, თბილისიდან 4500 კილომეტრით დაშორებულ ბარსელონაში ითამაშა, კაპიტანი უკრაინასთან მატჩში მოედანზე იქნება და საქართველოს უკრაინასთან მატჩში დაეხმარება.
უკრაინასთან მატჩი გამორჩეული იქნება ვეტერანი კალათბურთელისთვის გიორგი შერმადინისთვის, რომელიც ეროვნული ნაკრების მაისურით თბილისში ბოლოჯერ ითამაშებს. ქართველი ცენტრი ეროვნულ გუნდში პირველად 2006 წელს ლუქსემბურგთან გამოჩნდა, მას მერე, ნაკრებს თითქმის 20 წელი ეხმარებოდა, უკრაინასთან თამაში კი მისთვის რიგით 201-ე იქნება. შერმადინი ეროვნულ გუნდს ესპანეთთან მატჩში დაემშვიდობება და სანაკრებო კარიერას დაასრულებს.
რაც შეეხება ნაკრების ნატურალიზებულ ამერიკელი კალათბურთელს, მიუნხენის ბაიერნის უკანახაზელ კამარ ბოლდუინს ტრავმა აქვს და უკრაინასთან და ესპანეთთან მატჩებს გამოტოვებს. ნატურალიზებული მოთამაშის ადგილი ჩვენს ნაკრებში თად მაკფადენმა დაიკავა, რომელიც საქართველოს ნაკრების ღირსებას 2018-2023 წლებში იცავდა.
გთავაზობთ ჩვენი ნაკრების 12-კაციან განაცხადს უკრაინასთან მატჩში: თორნიკე შენგელია, გიორგი შერმადინი, თად მაკფადენი, რატი ანდრონიკაშვილი, კახა ჯინჭარაძე, ბექა ბურჯანაძე, დუდა სანაძე, გიორგი ტურძილაძე, გიორგი კორსანტია, ალექსანდრე ფევაძე, ლუკა მაზიაშვილი, მათე ხატიაშვილი.
ახლა კი რამდენიმე მნიშვნელოვანი ინფორმაცია უკრაინის საკალათბურთო ნაკრების შესახებ, რომელიც თბილისში შეიძლება ითქვას, რომ დიდი დანაკლისით ჩამოვიდა. პირველ რიგში უნდა აღინიშნოს, რომ ნაკრებში ამჯერადაც ვერ ვიხილავთ ალექსეი ლენს, რომელიც რეალ მადრიდში ირიცხება. სხვადასხვა მიზეზთა გამო, ეროვნული გუნდის განაცხადში ასევე ვერ მოხვდნენ ვიტალი ზოტოვი, იუსუფ სანონი, ილი სიდოროვი და ბოჰდან ბლიზნიუკი.
გთავაზობთ უკრაინის საკალათბურთო ნაკრების 12-კაციან განაცხადს: ალეკსანდრ კოვლიარი (ბუდუჩნოსტი, მონტენეგრო), ეგორ სუშკინი (კიევ-ბასკეტი), მიხაილ ბუბლიკი (კიევ-ბასკეტი), ილია ტირტიშნიკი (კატანძარო, იტალია), ივან ტკაჩენკო (უკლუბოდ), ალეკსანდრ ლიპოვი (რაპიდი, რუმინეთი), არტიომ კოვალიოვი (ბაიროითი, გერმანია), ანდრეი ვოინალოვიჩი (საბაჰი, აზერბაიჯანი), ვიაჩესლავ ბობროვი (დინამო, რუმინეთი), როსტისლავ ნოვიცკი (ვეფ, ლატვია), მაკსიმ კლიჩკო (მონაკო, საფრანგეთი), არტიომ პუსტოვოი (ანდორა, ესპანეთი).
“სამწუხაროდ, მომდევნო მატჩებს დიდი დანაკლისით ვხვდებით. ტრავმის გამო ვიტალი ზოტოვი ვერ ითამაშებს. ასევე ვერ დაგვეხმარება ისუფ სანონი, რომელმაც ზურგის ტრავმა მიიღო. ილია სიდოროვი ამ შეხვედრებში მონაწილეობას ოჯახური მიზეზის გამო ვერ ახერხებს. იმედი გვქონდა, რომ დაგვეხმარებოდა ბლიზნიუკი, მაგრამ მან ახლახან ტაივანში გააფორმა კონტრაქტი და არც ის იქნება ჩვენთან ერთად. შესაბამისად, ჩვენს წინაშე არსებული ამოცანებების გადაწყვეტა იმ შემადგენლობით მოგვიწევს, რომელიც გვყავს“, - განაცხადა უკრაინის მთავარმა მწვრთნელმა აინარს ბაგატსკისმა.
გაგაცნობთ მსოფლიოს 2027 წლის ჩემპიონატის საკვალიფიკაციო ტურნირის ფორმატს: პირველ ჯგუფურ ეტაპზე 2 წრე ჩატარდება და საუკეთესო 3 ნაკრები მომდევნო (ჯგუფურ) ეტაპზე გავა, სადაც ასევე 3 საუკეთერსო სხვა ჯგუფიდან (საბერძნეთი, მონტენეგრო, პორტუგალია, რუმინეთი) გადმოვა და შედგება 6-გუნდიანი ჯგუფი. პირველი ეტაპზე ერთმანეთში ნაჩვენები შედეგები გუნდებს მე-2 ჯგუფში გადაჰყვებათ და იქ მხოლოდ იმ გუნდებს შეხვდებიან, რომლებთანაც მანამდე არ უთამაშიათ (მატჩები 2026 წლის აგვისტო-ნოემბერში და 2027 წლის თებერვალში ჩატარდება). საბოლოო ჯამში, ჯგუფების 3-3 საუკეთესო ნაკრები (ჯამში 12) მსოფლიოს ჩემპიონატზე თამაშის უფლებას მოიპოვებს.
სტატიის ბოლოში, კიდევ ერთხელ შეგახსენებეთ, რომ უკრაინასთან მატჩი დღეს, თბილისი არენაზე, ჩვენი დროით 21:00 საათზე გაიმართება.
