"ჯალოროსიში" გადასვლის შემდეგ, ის იქცა 80-იანების სერია ა-ს ერთ-ერთ საუკეთესო ნახევარმცველად, თუმცა მას ჰქონდა ერთი პრობლემა - ხშირი ტრავმიანობა. "მგლებში" აღარ ჰქონდათ იმის იმედი, რომ მათი 10-იანი დაუბრუნდებოდა ოპტიმალურ ფორმას, რის შედეგადაც მოთამაშე ტრანსფერზე იქნა დაყენებული.
"კაპიტოლინიმ" თავის რიგებში გადმოიბირა რუდი ფიოლერი და ლიონელო მანფრედონიო, რის შედეგადაც კლუბის ხარჯმა მნიშვნელოვნად გადააჭარბა შემოსავალს, საჭირო იყო ვინმეს გაყიდვა. ტრავმიანობის მიუხედავად, ანჩელოტის სატრანსფერი ბაზარზე მსურველები მაინც ჰყავდა და ყველაზე მეტად "როსონერი" აქტიურობდა.
თავად იტალიელი ნახევარმცველი "შავ-წითლების" ინტერესის შესახებ შემდეგნაირად საუბრობდა - "საკი შეპყრობილი იყო ჩემი გადმობირების იდეით. არიგო ჩემს ტრანსფერს ვან ბასტენისა და გულიტის გაფორმებაზე წინაც კი აყენებდა. მილანის ინტერესი იყო ძალიან სასიამოვნო, მითუმეტეს, რომ რომაში თამაშის სურვილი აღარ მქონდა.
ადრე მამოძრავებდა ენთუზიაზმი და ვნება, თუმცა დროთა განმავლობაში ეს ყველაფერი გაქრა. "ჯალოროსიმ" გადაწყვიტა ჩემი მოშორება და ჩემს ხარჯზე თავისი ფინანსური მდგომარეობის გამოსწორება. შვებულებაში ვიყავი, როდესაც დამირეკეს და მითხრეს, რომ "როსონერიში" გამყიდეს. მომცეს იმ სასტუმროს მისამართი, სადაც "შავ-წითლების" უფროსობას უნდა შევხვედროდი.
მივედი სასტუმროში, პორტიემ მომაწოდა გასაღები, თვალი ჩამიკრა და გამიღიმა. გაკვირვებული დავრჩი, ვერაფერი გავიგე. სასტუმროს ნომერში დამხვდა შამპანიური და ტკბილეული, გვერდითა ოთახიდან კი ახალგაზრდა მელოტი კაცი გამოვიდა. თავიდან ვერ ვიცანი, მაგრამ კარგად რომ დავაკვირდი, გალიანი აღმოვაჩინე.
ყველაფერი დადგა თავის ადგილზე, თუ რატომ ჩამიკრა თვალი პორტიემ - სასტუმრო, ორი მამაკაცი, შამპანიური და ტკბილეული, მას ეგონა, რომ ჩვენ პაემანი გვქონდა", - იუმორით იხსენებს ამ ამბავს კარლო, რომელიც ლომბარდიელებთან ერთად მოგვიანებით ისტორიას დაწერს. ყველას გვახსოვს, თუ რას წარმოადგენდნენ სან სიროს ბინადრები 80-იანების ბოლოსა და 90-იანების დასაწყისში.
ბევრის აზრით, საკის კოლექტივი ფეხბურთის ისტორიაში საუკეთესო გუნდია. ამ ყველაფრის შემადგენელი ნაწილი იყო "მგლების" ყოფილი ნახევარმცველიც, რომელიც ჯვარედინი მყესების ორჯერ გაწყვეტის შემდეგ, იტალიის დედაქალაქში ჩამოწერეს. დღეს, ევროპა ლიგის 1/4 ფინალში ერთმანეთს სწორედ მილანი და "კაპიტოლინი" შეხვდებიან. საინტერესოა, ვის მხარეს იქნება 64-წლის სპეციალისტი.
