ნორვეგიელი თავდამსხმელი და ინგლისელი ნახევარმცველი ახლო ურთიერთობას დღემდე ინარჩუნებენ.
"ის ახლაც გვერდში მიდგას. მუნდიალის დაწყების წინ, ჰოლანდმა წარმატება მისურვა. პერიოდულად გვაქვს ერთმანეთთან მიმოწერა, ის ხშირად მიგზავნის სულელურ ვიდეოებს, მე კი საპასუხოდ მას, ერთად ვიცინით", - ამბობს "სამეფო კლუბის" გამთამაშებელი ნორვეგიელი ფორვარდის შესახებ, 2022 წლის დეკემბერში.
მსოფლიო ჩემპიონატის მსვლელობისას "ბლანკოსის" ხუთიანმა ერლინგს წაკბინა კიდეც:
"უკვე რამდენიმე კვირაა, რაც მისი რეკორდების შესახებ არაფერი მსმენია, სად არის ის? ვიცი, როგორც კი დასრულდება მუნდიალი, ჩვენ ისევ მოგვიწევს ჰოლანდის შესახებ სხვადასხვა ამბის უსასრულოდ მოსმენა", - ხუმრობდა 20 წლის გამთამაშებელი.
ნორვეგიელი თავდამსხმელი და ბელინგემი ვესტფალიაში საუკეთესო მეგობრები იყვნენ. გავიხსენოთ მათი მეგობრობის ერთ-ერთი ყველაზე გამორჩეული მომენტი: 2021 წლის სექტემბერი, ჩემპიონთა ლიგა, ერლინგის მატჩის შემდგომი ინტერვიუ, რომლის დროსაც კადრში ჩნდება ინგლისელი გამთამაშებელი და თანაგუნდელს ლოყაზე კოცნის.
"შავ-ყვითლებმა" იმ შეხვედრაში იმარჯვეს ბეშიქთაშთან - ჯუდმა გაიტანა გოლი და ნორვეგიის ნაკრების თავდამსხმელს საგოლე გადაცემა გაუკეთა. შემდეგი მატჩი იყო გერმანიის ჩემპიონატში, უნიონ ბერლინთან და იგივე ჟესტი ამჯერად უკვე სიგნალ იდუნა პარკის ბინადრების 9-იანმა გაიმეორა. ფაქტია, ისინი მოედანზე ერთმანეთს ძალიან კარგად ავსებდნენ.
23 წლის თავდამსხმელმა და ინგლისის ნაკრების ნახევარმცველმა დორტმუნდში ერთად 63 შეხვედრა ჩაატარეს. 2022 წლის ზაფხული - "ქალაქელებს" თავიანთ რიგებში მიყავთ ჰოლანდი და უკვე სექტემბერში, ის ევროპის ყველაზე პრესტიჟულ საკლუბო ტურნირზე უპირისპირდება თავის ყოფილ კლუბს, ბორუსიას.
შეხვედრის დაწყების წინ, 20 წლის ნახევარმცველი ამბობდა:
"არ ვიცი, როგორ შევაჩერო ჰოლანდი. ამ კითხვაზე რომ მქონდეს პასუხი, ჩემი ღირებულება უფრო მეტი იქნებოდა. რაც არ უნდა იყოს, ერლინგი უნდა გავანეიტრალოთ, წინააღმდეგ შემთხვევაში, განწირულები ვართ", - აცხადებდა ვესტფალიელთა იმდროინდელი 22-ე ნომერი.
"შავ-ყვითლებმა" მიზანს ვერ მიაღწიეს - "ლურჯების" თავდამსხმელმა, 84-ე წუთზე, გამარჯვების მომტანი გოლი გაიტანა. ის შეხვედრა ანგარიშით 2:1 დასრულდა. ცნობისთვის, 80-ე წუთამდე იგებდნენ სიგნალ იდუნა პარკის ბინადრები, გოლის ავტორი კი ბელინგემი იყო. რა მოხდა შემდეგ? პეპ გვარდიოლას გუნდის 9-იანმა მოიგო ტრიპლეტი, ინგლისელი გამთამაშებელი კი გერმანიის ჩემპიონატის სეზონის საუკეთესო მოთამაშე გახდა.
მოგვიანებით, ჯუდმა Golden Boy-ს ჯილდოც მიიღო, ისევე როგორც 23 წლის თავდამსხმელმა რამდენიმე სეზონით ადრე. დღეს, ორივე მათგანი უკვე ოქროს ბურთის მოგების უმთავრესი კანდიდატები არიან. ჰოლანდი, ჯეკ გრილიშთან ერთად აქტიურად თაფლავდა დორტმუნდის გამთამაშებელს ეტიჰადზე გადმოსვლაზე, მაგრამ მან ბერნაბეუ არჩია.
20 წლის ნახევარმცველი ისევე ეფექტურად შემოიჭრა ლა ლიგაში, როგორც ნორვეგიელი თავდამსხმელი გასული სეზონის პრემიერ ლიგაში. კარგად გვახსოვს ბელინგემის სადებიუტო კლასიკო, სადაც მან ბარსელონას ორი გოლი გაუტანა. ეს ფაქტი ერლინგს არ გამორჩენია:
"ეს ბიჭი უბრალოდ წარმოუდგენლად ძლიერია", - განაცხადა სიტის ფორვარდმა ინგლისელი გამთამაშებლის შესახებ.
დღეს, მანჩესტერული გუნდი წარმოუდგენელია თავისი ცხრიანის გარეშე, ისევე როგორც რეალი, ჯუდის გარეშე. მათი პირველი შეხვედრა მოწინააღმდეგეების რანგში 23 წლის ფორვარდის მოგებით დასრულდა, მაგრამ მაშინ, ინგლისის ნაკრების გამთამაშებელი თამაშობდა ბორუსიაში და შეიძლება ითქვას, რომ შანსები არათანაბარი იყო.
20 წლის ნახევარმცველი ახლა სულ სხვა გარემოშია და ვნახოთ, ამჯერად უკვე მადრიდელ თანამებრძოლებთან ერთად, როგორ შეძლებს ის ჰოლანდის შეჩერებას. წარსულში თანაგუნდელები, დღეს კი მეტოქეები და ოქროს ბურთის მოგების ერთ-ერთი უმთავრესი კანდიდატები. ერთი სიტყვით, ნორვეგიელი ფორვარდისა და "სამეფო კლუბის" 5-იანის ისტორიაში დღეს ახალი თავი დაიწერება.
