2004/2005 წლების სეზონში ლონდონის ჩელსი გახდა პრემიერ ლიგის გამარჯვებული, ისე რომ სეზონის განმავლობაში მხოლოდ 15 გოლი გაუშვა. "არისტოკრატების" რეკორდი დღემდე ხელშეუხებელია, მაგრამ ბრიტანულ საფეხბურთო წრეებში უკვე საუბრობენ, რომ ახალი რეკორდსმენი შესაძლოა ლონდონის არსენალი აღმოჩნდეს.
პრემიერ ლიგის მიმდინარე სეზონის 11 ტურის შემდეგ, "მეთოფეებმა" ჯერჯერობით ხუთი გოლი გაუშვეს. ამ ფაქტის შესახებ ისაუბრეს ტიერი ანრიმ და დიდიე დროგბამ, მეტიც, ლეგენდარულმა ფორვარდებმა სანაძლეოც კი დადეს. პირობები ასეთია: თუ ემირეიტსის ბინადრები სეზონს დაასრულებენ 15-ზე ნაკლები გაშვებული ბურთით, ივუარელი ექს-შემტევი თავისი ფრანგი ოპონენტის მაისურს მოირგებს.
საუბარია არსენალის 14-ნომრიან მაისურზე, ასევე ქუდზე, რომელზეც საფრანგეთის ნაკრების ყოფილი თავდამსხმელი იქნება გამოსახული. სტემფორდის ბინადრების ექს-ფორვარდი თავდაპირველად აუცილებელ პირობად თვლიდა "მეთოფეების" ჩემპიონობასაც, მაგრამ მოგვიანებით, ანრიმ ის გადაარწმუნა.
