პრემიერ ლიგის მე-11 ტურის ერთ-ერთი ცენტრალური მატჩი ლონდონში გაიმართა, სადაც მაყურებელმა ტოტენჰემისა და მანჩესტერ იუნაიტედის დაპირისპირება იხილა. რუბენ ამორიმის გუნდი ამ შეხვედრას ძალიან კარგ ფორმაში შეხვდა, რასაც ვერ ვიტყოდით ტომას ფრანკის გუნდზე.
90 წუთის განმავლობაში გუნდებმა ერთმანეთს არაფერი დაუთმეს და თამამად შეგვიძლია იმის თქმა, რომ მატჩის აფიშამ გაამართლა. შეხვედრაში ყველაზე საინტერესო ამბები მატჩის მიწურულს მოხდა, როდესაც მაყურებელმა 3 გატანილი გოლი იხილა. საბოლოო ჯამში ამ დაპირისპირებას ლოგიკური დასასრული ჰქონდა, რადგან გუნდებმა ქულები გაიყვეს.
ტოტენჰემმა ამ მატჩის შემდეგ 18 ქულა მოაგროვა და დროებით მე-3 პოზიციაზე გადაინაცვლა. რაც შეეხება მანჩესტერ იუნაიტედს, "წითელმა ეშმაკებმაც" 18 ქულას მოუყარეს თავი, რითაც მე-7 პოზიციაზე გადასვლა მოახერხეს. რუბენ ამორიმის გუნდის წაუგებელი სერია კვლავ გრძელდება.
ტოტენჰემი 2-2 მანჩესტერ იუნაიტედი
გოლები: 0-1 ბრაიან მბიუმო 32', 1-1 მატის ტელი 84', 2-1 რიშარლისონი 90+1', 2-2 მატაის დე ლიხტი 90+6'.
მატჩის მიმოხილვა
