დღეს ლიმასოლში მიმდინარე ევრობასკეტზე C ჯგუფის მორე ტურის შეხვედრაში საქართველოს ნაკრებმა იტალიასთან 78:62 წააგო.
მატჩის შესახებ, საქართველოს ნაკრების წევრმა, ბექა ბურჯანაძემ ისაუბრა:
"ახლა თავს ცუდად ვგრძნობთ, რადგან წავაგეთ საკმაოდ ბევრი ქულით. შემიძლია ვთქვა, რომ ჩვენ ძალიან გამძლე გუნდი ვართ, დღესაც ერთიანობა გამოვავლინეთ და ამ ერთობით თამაშის განმავლობაში ბევრი კარგი მომენტი შევქმენით. მინდა მადლობა ვუთხრა ჩემ გუნდელებს ბოლო წამამდე ბრძოლისთვის.
ბოლო მეოთხედში იტალიელებს თამაში კარგად წაუვიდათ და მათი გაქცევა ვეღარ შევაჩერეთ. თქვენ ნახეთ როგორ ვიბრძოლეთ და ქულა-ქულაში მიდოდა თამაში, ვიგებდით კიდეც.
მიუხედავად იმისა, რომ ჩემი საქმე არ არის, ვიტყვი, რომ მსაჯობა შეიძლებოდა უკეთესი ყოფილიყო. ჩვენ ვიცით რატომ ვართ აქ და ჩვენი მიზანი უცვლელია, სისხლის ბოლო წვეთამდე ვიბრძოლებთ.
რაც შეეხება მომდევნო თამაშს საბერძნეთთან, ჩემთვის, როგორც კალათბურთელისთვის ეს მიუღებელია, ზედიზედ 2 თამაში, ძლიერ გუნდებთან. გულშემატკივარმა იცის საბერძნეთის ძლიერი კალათბურთელების შესახებ, არაამქვეყნიური დატვირთვაა მოთმაშეებისთვის, არამარტო ფიზიკური, გონებრივიც."
საქართველოს ევრობასკეტზე მორიგი მატჩი ხვალ საბერძნეთთან ელის, შეხვედრა თბილისის დროით, 16:00 საათზე დაიწყება.
ევრობასკეტი 2025 ოთხ ქვეყანაში – ლატვიაში, ფინეთში, პოლონეთსა და კვიპროსში ტარდება. აღნიშნულ ქვეყნებში ტურნირის თითო ჯგუფი 6 ნაკრების შემადგენლობით ასპარეზობს და 4 საუკეთესოს გამოავლენს. ჯგუფებიდან ჯამში გასული 16 ნაკრები მეორე ეტაპს პლეი-ოფს ლატვიის დედაქალაქ რიგაში ჩაატარებს, სადაც კონტინენტის ჩემპიონი გამოვლინდება.
საქართველოს ნაკრების მატჩების განრიგი, თბილისის დროით:
საქართველო – საბერძნეთი - 31 აგვისტო, 16:00 საათი
საქართველო – კვიპროსი - 2 სექტემბერი, 19:15 საათი
საქართველო – ბოსნია-ჰერცეგოვინა - 4 სექტემბერი, 16:00 საათი
