მას შემდეგ, რაც იგორ ტუდორმა იუვენტუსი დატოვა, "ბიანკონერიში" ახალი მთავარი მწვრთნელის შერჩევის პროცესი დაუყონებლივ დაიწყეს. განიხილებოდა რამდენიმე კანდიდატურა, მათ შორის რობერტო მანჩინი და რაფაელე პალადინოც, თუმცა საბოლოო არჩევანი მაინც გამოცდილ ლუჩანო სპალეტიზე შეჩერდა. 66 წლის იტალიელ მწვრთნელს ახალ კლუბში უკვე ელოდებიან, სადაც მხარეებს შორის ხელშეკრულება გაფორმდება. ბოლო მომენტში რაიმე გაუთვალისწინებელი თუ არ მოხდა, იუვენტუსი ლუჩანო სპალეტის კვირის ბოლომდე ოფიციალურად წარადგენს.
ლუჩანო სპალეტი ბოლოს იტალიის ეროვნულ ნაკრებში მუშაობდა, საიდანაც მიმდინარე წლის 10 ივნისს წამოვიდა. მას შემდეგ გამოცდილ იტალიელ სპეციალისტს რამდენიმე კლუბს აქტიურად უკავშირებდნენ, თუმცა დღევანდელ დღემდე ლუჩანო სპალეტი უგუნდოდ იყო.
იუვენტუსსა და ლუჩანო სპალეტის შორის კონტრაქტი სეზონის ბოლომდე გაფორმდება, თუმცა მხარეებს ზაფხულში ხელშეკრულების გახანგრძლივება ავტომატურად შეეძლებათ. შეგახსენებთ, ლუჩანო სპალეტი სერია A-ში ბოლოს 2021-2023 წლებში მუშაობდა, რა დროსაც ნაპოლისთან ერთად სკუდეტო მოიგო.
