ჯორჯო კიელინის ყველაზე ხშირი მოწინააღმდეგე სერია ა-ს ფარგლებს გარეთ იყო მადრიდის რეალი, რომლის წინააღმდეგ მან ჩაატარა რვა შეხვედრა, მათ შორის ერთი ევროპის მთავარი საკლუბო ტურნირის ფინალიც. იტალიელმა ყოფილმა უკანახაზელმა "სამეფო კლუბის" მხრიდან ყველაზე უხერხული მეტოქე დაასახელა.
"რეალი დაგვიმარცხებია მაშინ, როდესაც ამ გუნდის მთავარი ვარსკვლავები შეუჩერებლები იყვნენ. დიახ, ჩემპიონთა ლიგის ფინალში დავუშვით რამდენიმე შეცდომა, რის გამოც წავაგეთ. ყველაზე უხერხული მეტოქე მადრიდიდან? ასეთი, საუკეთესო ფორმაში მყოფი ისკო იყო.
ესპანელი გამთამაშებელი გვირევდა გეგმებს და მისი განეიტრალება მართლაც ურთულესი იყო. ის მომენტებს ქმნიდა როგორც ცენტრიდან, ისე მარჯვნიდან და მარცხნიდანაც. არ ვიცოდით, თუ რა უნდა გვექნა ამ ყველაფრის დასასრულებლად."
