ბრიტანულმა ონლაინ გამოცემა,FootballFanCast-მა ნიუკასლ იუნაიტედის თავდამსხმელს, ვახტანგ სალიას სტატია მიუძღვნა. პორტალმა აღნიშნა, ქართველი ფორვარდი პერსპექტივაში შესაძლოა გახდეს "კაჭკაჭების" ახალი სუპერვარსკვლავი და ნიკ ვოლტემადეზე წინაც კი აღმოჩნდეს.
"ნიუკასლ იუნაიტედმა იზრუნა პერსპექტივაზე და გაიფორმა სალია, რომელიც ამ სეზონს 21-წლამდელთა გუნდში დაიწყებს. ახალგაზრდა ფორვარდს აკვირდებოდნენ რეალი, ბარსელონა, ბაიერნი, პარის სენ-ჟერმენი, სიტი და არსენალი, მაგრამ ყველას აჯობეს "კაჭკაჭებმა" და ვახტანგთან 5-წლიანი კონტრაქტი გააფორმეს.
"ჯორდებმა" დაიმატეს ფეხბურთელი, რომელიც მომავალში შესაძლოა ნამდვილი სუპერვარსკვლავი გახდეს. თუ ყველაფერი წარიმართა სწორად, ქართველმა ფორვარდმა შესაძლოა ვოლტემადესაც აჯობოს. ეს არის კიდევ ერთი გამორჩეული ახალგაზრდა მოთამაშე, რომელიც სენტ ჯეიმს პარკზე ზაფხულში გადმოვიდა."
