არდა გულერი (თურქეთის ნაკრები, მადრიდის რეალი)
"თურქ მესით" წოდებული ფეხბურთელი, რომელიც თავისი ქვეყნის ნაკრების მთავარ იმედად მოიაზრება. ფენერბახჩედან რეალში გადასვლის შემდეგ, გულერმა იმდენად კარგი შთაბეჭდილება დატოვა, რომ მისი იჯარით სხვა კლუბში გაშვება გამორიცხეს. მადრიდში არსებული არაამქვეყნიური კონკურენციის მიუხედავად, არდამ 12 მატჩში 6 ბურთის გატანა მოახერხა.
თურქი შემტევი ნახევარმცველი 19 წლის არის, თუმცა ის ევროპის ჩემპიონატზე მიემგზავრება არა როგორც უბრალოდ იმედისმომცემი ახალგაზრდა, არამედ როგორც ბოსფორელთა ერთ-ერთი ლიდერიც. შეგახსენებთ, 18 ივნისს "სამეფო კლუბის" გამთამაშებლის შეჩერება საქართველოს ეროვნული გუნდის მოთამაშეებს მოუწევთ.
კობი მეინუ (ინგლისის ნაკრები, მანჩესტერ იუნაიტედი)
მეინუ არის კატასტროფული მანჩესტერის ის იშვიათი ფეხბურთელი, რომლის მისამართით პრეტენზიები არ გვაქვს. მას შეეძლო განის ნაკრებში თამაში, მაგრამ კობიმ აირჩია უფრო რთული გზა და ვარსკვლავებით სავსე ინგლისის ეროვნულ გუნდს შეუერთდა. ის არის 19 წლის, მაგრამ ასაკის მიუხედავად, იუნაიტედის ხილვა ინგლისელი შუახაზელის გარეშე უკვე წარმოუდგენელია.
"წითელი ეშმაკების" ნახევარმცველი არ ჩადის ევროპის ჩემპიონატზე როგორც რიგითი სათადარიგოთა ფეხბურთელი, ის თავისი შანსისთვის აუცილებლად იბრძოლებს. ძალიან იმედისმომცემად გამოიყურება დეკლან რაისისა და მეინუს დუეტი, რომელიც პერსპექტივაში შესაძლოა "3 ლომის" სავიზიტო ბარათადაც იქცეს.
გაბრიელ სიგუა (საქართველოს ნაკრები, ბაზელი)
ორმაგად საინტერესოა ახალგაზრდა ტალანტის ხილვა ევროპის ჩემპიონატის დებიუტანტი ნაკრებისგან. კანკავას საქართველოს ეროვნული გუნდიდან წასვლა მოტივირებული იყო იმით, რომ მან გზა ახალგაზრდა თაობას გადაულოცა. ვილი სანიოლმა მომავლის პერსპექტივა დაინახა სწორედ სიგუაში, მოთამაშეში, რომელმაც თავისი შრომით ევრო 2024-ზე მოხვედრა ნამდვილად დაიმსახურა.
გაბრიელი 19 წლის ასაკში ცდილობს ევროპულ დიდ ფეხბურთში დამკვიდრებას და ბაზელში მოხვედრა საამისოდ ძალიან კარგი შესაძლებლობა უნდა იყოს. ქართველმა შუახაზელმა უკვე მოასწრო "წმინდანებში" 19 მატჩის ჩატარება და 3 ბურთის გატანა. მისი სადებიუტო სეზონი იქნებოდა კიდევ უფრო შთამბეჭდავი რომ არა ტრავმები, რის გამოც "როთბლაუს" ჰავბეკმა საერთო ჯამში 8 მატჩი გამოტოვა.
ლამინ იამალი (ესპანეთის ნაკრები, ბარსელონა)
ბარსელონას აკადემიის წარმომადგენელი, რომელიც 16 წლის ასაკში უკვე არის მთავარი გუნდის სრულფასოვანი წევრი. იამალმა განვლილ სეზონში ჩაატარა 50 მატჩი და გაიტანა 7 ბურთი. ცნობისთვის, ლამინმა ესპანეთის ეროვნულ გუნდში სადებიუტო გოლი საქართველოს ნაკრებს გაუტანა. საუბარია მატჩზე, რომელშიც "ფურია როხამ" 7:1 მოიგო.
ესპანელი გარემარბის ხელში ჩაგდებას ცდილობდა პარის სენ-ჟერმენი, თუმცა კატალონიელებისთვის ის ხელშეუხებელი ფეხბურთელია. რა როლი ექნება "ბლაუგრანას" ვინგერს ევრო 2024-ზე? მისი გამოძახება ნამდვილად არ ყოფილა ფორმალობა, მასზე ამყარებენ უდიდეს იმედს და ცხადია, ის ძირითადის მოთამაშედაც განიხილება.
ვარენ ზაირ-ემერი (საფრანგეთის ნაკრები, პსჟ)
საფრანგეთის ნაკრებში ნამდვილად არ არის მაღალი დონის ნახევარმცველების დეფიციტი, თუმცა ამის მიუხედავად, 18 წლის ზაირ-ემერიმ ეროვნულ გუნდში მოხვედრა მაინც დაიმსახურა. ვარენი ძალიან კარგი იყო, როგორც ლიგა 1-ში, ისე ჩემპიონათა ლიგაზეც და სეზონის მანძილზე მან რამდენიმე ახალგაზრდული რეკორდიც მოხსნა.
კილიან მბაპეს რეალში გადასვლის შემდეგ, პარის სენ-ჟერმენს სჭირდება ახალი ლიდერი და სახე, გულშემატკივრები ასეთ ფეხბურთელად სწორედ ფრანგ შუახაზელს ხედავენ. პსჟ-ს ჰავბეკი არის თითქოს ნ'გოლო კანტესა და პოლ პოგბას ნაზავი, რომელსაც შეუძლია როგორც შეტევის ჩაშლა, ისე ბურთის განაწილებაც.
