მართალია, არგენტინის ნაკრების ყოფილ საყრდენ ნახევარმცველს უეფას თასის გარდა არაფერი მოუგია, თუმცა, მისი "ნერაძურიში" ყოფნის პერიოდი უფრო სხვა მიზეზის გამოა გამორჩეული. ჩოლომ სწორედ "შავ-ლურჯებში" ყოფნის დროს გადაწყვიტა მწვრთნელობა და ამის შესახებ მან სხვადასხვა დროს არაერთხელაც ისაუბრა.
"ინტერში თამაშის დროს მივხვდი, რომ მწვრთნელობა მინდოდა. დიახ, მე იქ არ მომიგია მნიშვნელოვანი ჯილდოები, თუმცა მივიღე ცოდნა, რომელიც მომავალში ძალიან დამეხმარა. ყურადღებით ვაკვირდებოდი სპეციალისტების მუშაობას და ყველაფერ მნიშვნელოვანს ჩემთვის ვინიშნავდი", - აცხადებდა 53 წლის ტაქტიკოსი.
ამის გარდა, უკვე უშუალოდ მწვრთნელობის დროს, სიმეონეს არაერთხელ გამოუთქვამს ჯუზეპე მეაცაზე დაბრუნების სურვილი. მივყვეთ ქრონოლოგიურად, 2015 წელი, "ადრე თუ გვიან იტალიის ჩემპიონატში დავბრუნდები. ინტერში ან ლაციოში მუშაობა მინდა. ამ კლუბებთან ძალიან ტკბილი მოგონებები მაკავშირებს".
2017 წელი - "ინტერში დაუმთავრებელი საქმეები დამრჩა. ეს არის დიდებული გუნდი. ძალიან ბევრი ადამიანი მიწინასწარმეტყველებს იქ დაბრუნებას, მაგრამ სამწუხაროდ, მხოლოდ ჩემს სურვილზე ეს დამოკიდებული არ არის". 2018-შიც თითქმის იგივე, "ადრე თუ გვიან ინტერში დავბრუნდები, ეს დროის საკითხია".
2020 წელი - "მქონდა უამრავი შემოთავაზება ევროპის სხვადასხვა ლიგებიდან, თუმცა ატლეტიკოს დატოვების შემთხვევაში, მხოლოდ ინტერში წავალ", - როგორც ვხედავთ, მილანურ კლუბს არგენტინელი ტაქტიკოსის გულში მართლა განსაკუთრებული ადგილი უკავია. 2024 წელს, ის მეტოქე გუნდის დამრიგებლის რანგში დაუპირისპირდა სწორედ "ნერაძურის".
დიეგო არც მატჩების დაწყებამდე იშურებდა კომპლიმენტებს "შავ-ლურჯების" მიმართ. პირველი შეხვედრის წაგების შემდეგაც კი, მისი თამაშისშემდგომი კომენტარი მეაცას ბინადრების სიძლიერეს ეძღვნებოდა. ამ ყველაფრის შემდეგ, ისმის ლოგიკური კითხვა, სჭირდებათ თუ არა ატლეტიკოს ამჟამინდელ მწვრთნელსა და ინტერს ერთმანეთი?
როგორც ვხედავთ, ჩოლოს მადრიდში თავი არ ამოუწურავს, მილანურ გუნდი კი მეოცე სკუდეტოს გზაზეა. არ ღირს სიმონე ინძაგის შრომის წყალში ჩაყრა ერთი წაგების გამო, ამ ადამიანმა "ნერაძურისთვის" ძალიან ბევრი გააკეთა. იტალიელ ტაქტიკოსს კლუბიდან გაშვება არ ემუქრება, 53 წლის სპეციალისტს "როხიბლანკოში" მითუმეტეს არ ემუქრება.
აქედან გამომდინარე, შეგვიძლია დავასკვნათ, რომ "შავ-ლურჯებისა" და სიმეონეს რეიუნიონი კიდევ რამდენიმე წლით გადაიდო. არგენტინელი მწვრთნელის მოქმედი ხელშეკრულება "ინდიელებთან" გათვლილია 2027 წლამდე, მეაცას ბინადრების დამრიგებლის კი 2025-მდე, მაგრამ დღის წესრიგში ორწლიანი გახანგრძლივების საკითხი დგას. სამი წლის შემდეგ, ამ ისტორიას კიდევ ერთხელ დავუბრუნდებით.
