დღეს სასტუმრო "შერატონ მეტეხი პალასში" ძიუდოში ევროპის ჩემპიონატთან დაკავშირებით, პრესკონფერენცია გაიმართა. საქართველოს დედაქალაქი ევროპირველობას 16-19 აპრილს უამსპინძლებს.
დღეს გამართულ პრესკონფერენციაზე საქართველოს ძიუდოს ეროვნული ფედერაციის პრეზიდენტმა ლევან ნოზაძემ, ვიცე-პრეზიდენტებმა, დავით ქევხიშვილმა და გიორგი ათაბეგაშვილმა, ძიუდოს კაცთა ნაკრების მთავარმა მწვრთნელმა, ლაშა გუჯეჯიანმა, ქალთა ნაკრების მთავარმა მწვრთნელმა, გიორგი თეთრაძემ და საქართველოს სპორტის მინისტრის მოადგილემ, ირალი დოლაბერიძემ სამზადისისა და მოლოდინის შესახებ ისაუბრეს.
ევროპირველობის სლოგანი - თბილისი ევროპის დედაქალაქი იქნება. სპეციალურად, შეჯიბრებისთვის შეიქმნა ლოგო.
თბილისში გასამართ ევროპირველობაზე 46 ქვეყნის 410 სპორტსმენი მიიღებს მონაწილეობას. ჩვენი გუნდი კი ევროპის ჩემპიონატზე პირველად იქნება სრული შემადგენლობით.
საქართველოდან ძიუდოს ვაჟებს შორის ასპარეზობაში მონაწილეობას მიიღებენ: გიორგი სარდალაშვილი (-60 კგ ), ვაჟა მარგველაშვილი (-66 კგ), ლაშა შავდათუაშვილი (-73 კგ), მიხეილ ბახბახაშვილი (-73 კგ), ტატო გრიგალაშვილი (-81 კგ), ლაშა ბექაური (-90 კგ), ლუკა მაისურაძე (-90 კგ), ილია სულამანიძე (-100 კგ ) და გურამ თუშიშვილი (+100 კგ);
გოგოებს შორის კი იასპარეზებენ: თამარ გიგოლაევი (-48 კგ), ჯულიეტა როდონაია (-48 კგ), ნინო თათრიშვილი (-52 კგ), ეთერ ლიპარტელიანი (-57 კგ), ნინო ლოლაძე (-57 კგ), ნინო წიკლაური (-63 კგ), ნინო გულბანი (-70 კგ), მარიამ ჭანტურია (-70 კგ), სოფიო სომხიშვილი (+78 კგ).
საქართველო ძიუდოში კონტინენტის პირველობას მეორედ მასპინძლობს, პირველად ევროპის ჩემპიონატი 2009 წელს ჩატარდა.
