21-წლიანი პაუზის შემდეგ, კომო სერია ა-ში დაბრუნდა. იყო დრო, როდესაც ეს გუნდი გაკოტრების პირას იმყოფებოდა, თუმცა 2019 წლიდან მოყოლებული დღემდე, ლომბარდიელები აღზევების პროცესში არიან. ყველაფერი დაიწყო მას შემდეგ, რაც კლუბი შეიძინეს ძმებმა მაიკლ და რობერტ ჰარტონოებმა - თამბაქოს ბიზნესში მოღვაწე მაგნატებმა.
2022 წლის ზაფხულში "ტბისპირელებში" აღმოჩნდა სესკ ფაბრეგასი, რომელიც თავდაპირველად ფეხბურთელის რანგში მივიდა. ის დათანხმდა ლონდონის ჩელსის ყოფილი კაპიტნისა და "ბიანკობლუს" ამჟამინდელი გენერალური დირექტორის, დენის უაიზის, წინადადებას. თავად ესპანელი ვეტერანი სინიგალიაზე გადმოსვლას ასე იხსენებს:
"უაიზის ზარით გაკვირვებული დავრჩი. მან შემომთავაზა კომოში გადმოსვლა სამწვრთნელო შტაბში შესვლის პერსპექტივით. მან იცოდა, რომ სამწვრთნელო საქმით დაინტერესებული ვიყავი", - იხსენებს ბარსელონას ყოფილი შუახაზელი, რომელსაც ორწლიანი ხელშეკრულება გაუფორმეს, მაგრამ მწვრთნელობა მან ბევრად უფრო ადრე დაიწყო.
37 წლის დამწყები მწვრთნელი 2023 წლის ივლისში ლომბარდიელთა 19-წლამდელთა გუნდის დამრიგებელი გახდა. იმავე წლის ნოემბერში კი მთავარი გუნდის დროებითი თავკაციც. დღეს, ფაბრეგასი არის "ტბისპირელთა" ამჟამინდელი დამრიგებლის, ოიშან რობერტსის ასისტენტი. მალე ის სრულფასოვან სამწვრთნელო ლიცენზიასაც აიღებს.
უაიზისა და ყოფილი ესპანელი ნახევარმცველის გარდა, "ბიანკობლუსთან" კავშირშია კიდევ ერთი ცნობილი სახე - ტიერი ანრი, რომელიც კლუბის ერთ-ერთი აქციონერია. ყოფილ ფრანგ ფორვარდს ჯერ კიდევ კატალონიაში თამაშის დროს სურდა კომოში ფულის ჩადება. ის შთააგონა კიდევ ერთმა ყოფილმა "ბლაუგრანელმა", ჯანლუკა ძამბროტამ.
ყოფილი იტალიელი მარჯვენა მცველი დაიბადა სწორედ იმ ტერიტორიაზე და მისი პირველი ნაბიჯები სწორედ იქიდან დაიწყო. რა მოსწონთ ინვესტორებს მოკრძალებულ ტბისპირა კლუბში? ბუნება, ატმოსფერო, მშვიდი გარემო და რაღაც მცირედან გრანდიოზულის შექმნის შესაძლებლობა. ერთი სიტყვით, სერია ა-ს ძალიან საინტერესო ახალწვეული ეყოლება.
