მსოფლიო რაგბის გადაწყვეტილებით, ახალი ტურნირი იქმნება, რომელიც სტარტს მომდევნო, 2026 წელს აიღებს და ზაფხულის და შემოდგომის ტესტებს ჩაანაცვლებს.
აღნიშნულ ტურნირში მონაწილეობას მსოფლიო რაგბის 24 საუკეთესო ნაკრები მიიღებს, რომლებიც ორ დივიზიონში გადანაწილდებიან — ერთა ჩემპიონატი და ერთა თასი.
საქართველო მეორე დონის ნაკრებებში და შესაბამისად ერთა თასზე მოხვდა, რაც იმას ნიშნავს, რომ ბორჯღალოსნები ტიერ 1-ის ნაკრებებთან დაპირისპირებას მხოლოდ მსოფლიო თასზე შეძლებენ.
2026 წლის ტურნირისთვის, საქართველოს ეროვნული ნაკრები A ჯგუფში იასპარეზებს და B ჯგუფის 6 ნაკრებს დაუპირისპირდება. ბორჯღალოსნები ივლისში 3 მატჩს გასვლაზე, ხოლო სამს ნოემბერში სახლში ითამაშებენ.
აღსანიშნავია, რომ 2030 წლამდე დივიზიონებს შორის ასვლა-ჩასვლის პრინციპი არ იქნება და შემდეგ მსოფლიო რაგბი პლეი-ოფის სისტემაზე იმსჯელებს. დიდი ალბათობით, 2030 წლიდან ერთა თასის ორივე ჯგუფის პირველადგილოსანი ერთა ჩემპიონატის ორივე ჯგუფის ბოლო ადგილოსნებს დაუპირისპირდება და გამარჯვების შემთხვევაში ზედა დივიზიონში ავა.
მსოფლიო რაგბის მიერ დამტკიცებული ახალი ტურნირის ორ წელიწადში ერთხელ ჩატარდება, რაც იმას ნიშნავს, რომ მსოფლიო თასს და ლომების ტურნეს არ დაემთხვევა. შესაბამისად, ნაკრებები ოპტიმალური შემადგენლობით იასპარეზებენ.
