ბაიერნი ინტერთან პირველ დაპირისპირებას უდიდესი დანაკლისით ხვდება. მანუელ ნოიერი, ალფონსო დევისი, ჰიროკი იტო, დაიო უპამეკანო, კინგსლი კომანი და ჯამალ მუსიალა — დიახ, ყველა ეს ფეხბურთელი ტრავმირებულია და ხვალ ვენსან კომპანის განკარგულებაში არ იქნებიან.
ტრავმებია ინტერშიც, თუმცა "რეკორდმაისტერისგან" განსხვავებით, აქ ბევრად კარგი სიტუაციაა. "ნერაძურიში" დაზიანებები აწუხებთ დენზელ დუმფრისს, პიოტრ ჟელინსკისა და მეჰდი ტარემის. სამატჩო განაცხადში არ იქნება კრისტიან ასლანიც, რომელსაც დისკვალიფიკაცია აქვს.
შეგახსენებთ, ბაიერნი-ინტერის პირველი დაპირისპირება 8 აპრილს, მიუნხენში გაიმართება. შეხვედრა თბილისის დროით 23:00 საათზე დაიწყება.









