მოდი შევხედოთ 2025 წლის ხუთ თამაშს, რომელსაც ფანები ყველაზე მეტად ელიან.
DOOM: The Dark Ages
დეველოპერი: id Software
გამომცემი: Bethesda Softworks
პლატფორმები: PC, PlayStation 5, Xbox Series S|X
გამოსვლის თარიღი: 15 მაისი
განთქმული სერიის ახალი პროექტი. DOOM: The Dark Ages არ აგრძელებს წინა ორი თამაშის ნარატივს და ამის ნაცვლად მათი პრიქუელი იქნება. ეს მხოლოდ სიუჟეტში არ აისახება – თამაში ბევრად უფრო ნელი და მეთოდური იქნება, სხარტი მოძრაობისა და პლატფორმინგის ნაცვლად ჩვენ აბჯარი და ფარი გვიკავია. იმისდა მიუხედავად, რომ მოვლენები შუა საუკუნეებში ვითარდება, არსენალში კვლავინდებურად შედის თოფები, ავტომატები, ყუმბარმტყორცნები, ბენზოხერხი და ბევრი სხვა ჩვეული იარაღის სახეობა. ამას პერიოდის შესატყვისი მორგენშტერნიც დაემატება.
წინასწარ რთულია იმაზე მსჯელობა, გამოვა თუ არა ახალი, ნელი გეიმფლეი ისეთივე კარგი, როგორიც წინა ორ თამაშში. ამას ორ თვეში გავიგებთ!
Gamepass-ის მომხმარებლები მის თამაშს უფასოდ შეძლებენ.
Clair Obscur: Expedition 33
დეველოპერი: Sandfall Interactive
გამომცემი: Kepler Interactive
პლატფორმები: PC, PlayStation 5, Xbox Series S|X
გამოსვლის თარიღი: 15 აპრილი
Clair Obscur: Expedition 33 არის იაპონური RPG თამაშებისთვის მიძღვნილი ოდა. გეიმდიზაინერი გიიომ ბროშე Final Fantasy-ს და Persona-ს დიდი ფანია, და Expedition 33-ს ეტყობა მათი შთაგონება. გეიმფლეი ძალიან წააგავს Persona-ს და Paper Mario-ს “turn-based” საბრძოლო სისტემებს, მაგრამ ამატებს ექშენ ელემენტებსაც. სამყაროს რუკა კი, რომლის გამოკვლევაც თავისუფლად იქნება შესაძლებელი, ძველი Final Fantasy-დანაა აღებული.
თამაშის ვიზუალი და თემატიკა ფრანგულ რევოლუციურ ტონს ატარებს, და ეს არცაა გასაკვირი – დეველოპერული გუნდის დიდი ნაწილი ადრე Ubisoft-სა და სხვა ფრანგულ სტუდიაში მუშაობდა. იმედია, მათი გამოცდილება საკმარისი იქნება Unreal Engine 5-ის პრობლემატურ ენჯინზე კარგი თამაშის შესაქმნელად.
ამას სულ მალე შევიტყობთ – Clair Obscur: Expedition 33 აპრილის ბოლოს გამოდის. ის ასევე იქნება ხელმისაწვდომი Gamepass-ის გამომწერთათვის.
Death Stranding 2: On The Beach
დეველოპერი: Kojima Productions
გამომცემი: Sony Interactive Entertainment
პლატფორმები: PlayStation 5
გამოსვლის თარიღი: 26 ივნისი
ლეგენდარულ იაპონელ გეიმდიზაინერ ჰიდეო კოჯიმას ბევრი გენიოსად მიიჩნევს. მოგწონთ თუ არა მისი თამაშები, ამასთან შედავება რთულია. თვითონ ჰიდეო იძახის, რომ მისი სხეულის 70% ფილმებისგან შედგება. და ეს, რა თქმა უნდა, მის თამაშებზეც აისახება. როდესაც ის Konami-ში იყო, Metal Gear Solid სერია განთქმული იყო კინემატოგრაფიულობით და რეჟისურით. საკუთარი სტუდიის დაარსების შემდეგ, მან კინემატოგრაფიულობაზე კიდევ უფრო დიდი აქცენტი გააკეთა, რის შედეგადაც Death Stranding-ი მხოლოდ თამაში არაა – ის მედიამოვლენაა.
პირველი ნაწილის ჩახლართული სიუჟეტი დასრულდა სიქუელის ტიზერით – და ჩვენ ამ სიქუელს 2025 წლის 26 ივნისს, ორიგინალის გამოსვლიდან ექვსი წლის შემდეგ ვიხილავთ.
Death Stranding 2: On The Beach სონიმ დააფინანსა, ასე რომ ის PlayStation 5-ის დროებითი ექსკლუზივი იქნება. ვიმედოვნებთ, რომ PC-ს და Xbox-ის პორტებს დიდი ხნით არ დააყოვნებენ.
საინტერესოა, რომ სტუდია A24 თამაშის ეკრანიზაციის გადაღებას აპირებს. ჯერჯერობით უცნობია, დაუბრუნდებიან თუ არა ნორმან რიდუსი, ლეა საიდუ, გილერმო დელ ტორო, ნიკოლას ვინდინგ რეფნი და ტროი ბეიკერი საკუთარ როლებს.
Ghost of Yōtei
დეველოპერი: Sucker Punch Productions
გამომცემი: Sony Interactive Entertainment
პლატფორმები: PlayStation 5
გამოსვლის თარიღი: 2025
ხუთი წლის წინ სუპერგმირული თემატიკით განთქმულმა სტუდია Sucker Punch-მა საკუთარი კომფორტის ზონიდან გადაწყვიტა გამოსვლა, რის შედეგადაც ჩვენ მივიღეთ Ghost of Tsushima – ჰიტი, რომელსაც არავინ ელოდა. შესანიშნავ გეიმპფლეისა და ვიზუალს თან ერთოდა დიდი სიფრთხილით, პატივისცემითა და ყურადღებით ასახული იაპონური კულტურა. ამ თამაშის გამოსვლამ კუნძულ ცუშიმაზე ტურიზმი გაზარდა, დეველოპერები კი მის საპატიო ელჩებად დასახელდნენ.
ხუთი წლის შემდეგ Sucker Punch-ი სიქუელს უშვებს, და ამჯერად მოლოდინი კარდინალურად განსხვავებულია – ყველა შედევრს ელოდება.
აღსანიშნავია, რომ ეს არ არის ჯინ საკაის სიუჟეტის გაგრძელება – მისი ისტორია ცუშიმაზე დამთავრდა, ახალი “აჩრდილი” კი ჰოკაიდოზე, იოტეის მთასთან მოიხვეჭს სახელს.
გამოსვლის თარიღი სამწუხაროდ უცნობია, მაგრამ ინდუსტრიის ინსაიდერები აცხადებენ, რომ ის 2025-ში გამოვა. დაველოდოთ!
Grand Theft Auto VI
დეველოპერი: Rockstar North
გამომცემი: Rockstar Games
პლატფორმები: PlayStation 5, Xbox Series S|X
გამოსვლის თარიღი: 2025
GTA VI. რისი თქმა შეიძლება რაც არავის უთქვამს? როგორც ყოველთვის, Rockstar-ის ეს თამაში იქნება მოვლენა. არ აქვს მნიშვნელობა, იქნება ის წინა თამაშებზე უკეთესი თუ არა, რა ეღირება (ბევრი ფიქრობს, რომ Rockstar-ი გახდება პირველი კომპანია, რომელიც თავის თამაშს $100 შეაფასებს), ან რა პლატფორმებზე გამოვა. ის თავად გაყიდის კონსოლებს. ხალხი ტექნიკის მაღაზიებს ტალღასავით წაიღებს. ასე მოხდა GTA IV-ის რელიზზე, GTA V-ის რელიზი კიდევ უფრო დიდი იყო. ყველაფერი იმაზე მეტყველებს, რომ ახალი თამაში ყველანაირ რეკორდს მოხსნის.
ოფიციალური განცხადებით, GTA VI-ს ჩვენ შემოდგომაზე ვიხილავთ.
რა თქმა უნდა, წელს კიდევ ბევრი საინტერესო თამაში გამოდის: Hollow Knight: Silksong, Metroid Prime 4: Beyond, Elden Ring Nightreign, Metal Gear Solid Δ: Snake Eater, და უამრავი სხვა. მაგრამ ჩვენ ამ ხუთეულზე შევარჩიეთ არჩევანი. ვიმედოვნოთ, რომ ყველა მოლოდინი გამართლდება!
