კოპა დელ რეის ნახევარფინალში მადრიდის ატლეტიკოსთან ანგარიშით 0:4 განადგურებით, ბარსელონამ და მისმა მთავარმა მწვრთნელმა, ჰანსი ფლიკმა რამდენიმე ანტირეკორდი დაამყარეს. კატალონიელებმა 4 ბურთი გაუშვეს შეხვედრის პირველ ნახევარში, რაც 2020 წლის აგვისტოს შემდეგ, პირველად მოხდა.
უკანასკნელი შემთხვევა იყო მიუნხენის ბაიერნის წინააღმდეგ გამართული მატჩი, რომელშიც "ბლაუგრანა" ანგარიშით 2:8 განადგურდა. ცნობისთვის, "რეკორდმაისტერს" სწორედ გერმანელი დამრიგებელი ხელმძღვანელობდა. რაც შეეხება "როხიბლანკოსს", აღნიშნულმა გუნდმა კამპ ნოუს ბინადრებს 4-ბურთიანი უპირატესობით 1989 წლის შემდეგ, პირველად მოუგო.
უშუალოდ ბარსელონას ამჟამინდელი მწვრთნელი ესპანეთში გადასვლის შემდეგ, ოთხგოლიანი სხვაობით პირველად დამარცხდა. რაც შეეხება 60 წლის დამრიგებლის ზოგად კარიერას, 4-ბურთით მან 2005 წლის შემდეგ პირველად წააგო. მისი კიკერს ოფენბახი ჰოფენჰაიმთან 2:6 განადგურდა.
ამ ანტირეკორდების მიუხედავად, ფლიკი არ თვლის, რომ 0:4 დიეგო სიმეონეს გუნდთან მის სამწვრთნელო კარიერაში ყველაზე მძიმე მარცხი იყო. გერმანელი დამრიგებლისთვის ასეთი წაგება არის 3:4 მილანის ინტერთან, ევროპის ყველაზე პრესტიჟული საკლუბო ტურნირის გასული სეზონის 1/2 ფინალში.
"იყო თუ არა ეს ყველაზე მძიმე ღამე ჩემს სამწვრთნელო კარიერაში? არა, ინტერთან მარცხი უფრო სამწუხარო იყო. მაშინ ყველაფერი დასრულდა, ახლა კი ქამბექის შანსი არსებობს. მართალია, თამაშის შემობრუნა იქნება ურთულესი, მაგრამ ჩვენ მაინც ვეცდებით."
