მანჩესტერ იუნაიტედის ერთ-ერთმა ფანგვერდმა, სახელწოდებით Manchester United Forever-მა ლენი იოროს პოსტი მიუძღვნა. პუბლიკაციის შინაარსი იყო ასეთი: მაშინ, როცა 19 წლის რიო ფერდინანდი იჯარით თამაშობდა ბორნმუთში, 19 წლის იაპ სტამი - ზვოლეში, 19 წლის ნემანია ვიდიჩი კი ცრვენა ზვეზდაში, 19 წლის ფრანგი უკანახაზელი უკვე "წითელ ეშმაკებში" ასპარეზობს.
აღნიშნულ პოსტში გასაოცარი არაფერია, რომ არა ერთი დეტალი - ფერდინანდის კომენტარი. ლეგენდარულ მცველს არ მოეწონა ოლდ ტრაფორდის ბინადრების ამჟამინდელ უკანახაზელთან შედარება და პასუხად მან გაიხსენა, თუ რას მიაღწია 19 წლის ასაკში.
"ბრო, 19 წლის ასაკში პრემიერ ლიგაში ჩატარებული მქონდა 100-მდე მატჩი და ინგლისის ნაკრებში დებიუტიც იმ დროს იყო", - წერს მანჩესტერის ყოფილი უკანახაზელი. საინტერესოა ის, რომ ინგლისელმა ვეტერანმა ცოტა გააბუქა: 19 წლის ასაკში მას გადაკვეთილი ჰქონდა არა 100-იანი, არამედ 50 თამაშიანი ნიშნული.
