გიორგი მამარდაშვილმა ვალენსიას შემადგენლობაში თავისი უკანასკნელი მატჩი ჩაატარა. სეზონის დასრულების შემდეგ, ახალგაზრდა ქართველი გოლკიპერი ლივერპულს შეუერთდება. ის "ღამურებში" თამაშობდა 2021 წლიდან და ამ დროის მანძილზე მან 134 შეხვედრაში მიიღო მონაწილეობა.
"ლოს ჩესის" მეკარეებს შორის მერსისაიდელების მომავალი კარის დარაჯი ჩატარებული მატჩების რაოდენობით არის მერვე ადგილზე, თუმცა თუ ავიღებთ მხოლოდ უცხოელ გოლკიპერებს, მას უსწრებს მხოლოდ დიეგო ალვეში, 176 შეხვედრით. კიდევ ერთი საინტერესო დეტალი არის 24 წლის კარის დარაჯის ბურთის გაშვების გარეშე ჩატარებული თამაშები.
მესტალიას ბინადრების 25-ე ნომერს დაუგროვდა 39 მშრალი მატჩი და 21-ე საუკუნეში მას უსწრებს მხოლოდ ორი მეკარე - ისევ და ისევ, ბრაზილიელი გოლკიპერი (51) და ლეგენდარული სანტიაგო კანისარესი (124).
ვალენსიას უცხოელი მეკარეები ყველაზე მეტი მატჩით
| მეკარე | მატჩების რაოდენობა | ქვეყანა |
| დიეგო ალვეში | 176 | ბრაზილია |
| გიორგი მამარდაშვილი | 134 | საქართველო |
| ნორბერტო ნეტო | 80 | ბრაზილია |
| იასპერ სილესენი | 57 | ნიდერლანდები |
| ტიმო ჰილდებრანდი | 39 | გერმანია |
ვალენსიას მეკარეები ყველაზე მეტი მშრალი მატჩით 21-ე საუკუნეში
| მეკარე | მშრალი მატჩების რაოდენობა |
| სანტიაგო კანისარესი | 124 |
| დიეგო ალვეში | 51 |
| გიორგი მამარდაშვილი | 39 |
| ვისენტე გუაიტა | 38 |
| ხაუმე დომენეკი | 35 |
