26 მარტს, საქართველოს ნაკრები მიხეილ მესხის სახელობის სტადიონზე ამხანაგურ მატჩს ისრაელის წინააღმდეგ გამართავს.
მოახლოვებული მატჩის წინ კომენტარი ისრაელის ნაკრების მთავარმა მწვრთნელმა რან ბენ შიმონმა გააკეთა.
"ვერც კი აღგიწერთ, რამდენად რთულია ჩვენთვის ამ მატჩისთვის მზადება. საომარ სიტუაციაში ფეხბურთელებს ოჯახის დატოვება და სხვა ქვეყანაში წასვლა უწევთ.
ნაკრების შეკრებაზე მოსვლის ასეთი სურვილი ჯერ არასდროს მინახავს. ფეხბურთელებს სურთ, რომ ერთად იყვნენ. ჩვენ უნიკალური ხალხის ნაწილი ვართ.
ჩვენ გვაქვს რამდენიმე ტაქტიკური ჩანაფიქრი და ერთად შევხედავთ, როგორ გავუმკლავდებით ამ სირთულეებს, საქართველოს წინააღმდეგ. ვეცდებით, მთლიანი ყურადღება ფეხბურთზე გადავიტანოთ და გამარჯვებისთვის ვიბრძოლოთ", - განაცხადა შიმონმა.
