![[VIDEO] ბაიერნის ბოლო მოგება რეალთან - მშრალი სერია, რომელიც უკვე 14 წელს ითვლის](/_next/image?url=https%3A%2F%2Flagazzetta-uploads.s3.us-east-1.amazonaws.com%2Fuploads%2Fposts%2Fuut75WJL7EdSzfJgyGSEFuP0CLb6gI5M.webp&w=3840&q=75)
ჩემპიონთა ლიგის მერვედფინალში მადრიდის რეალი მიუნხენის ბაიერნს დაუპირისპირდება. ამ გუნდებს ერთმანეთთან აკავშირებთ 28-თამაშიანი ისტორია, რომელშიც როგორც "სამეფო კლუბმა", ისე "რეკორდმაისტერმაც" 12-12 შეხვედრა მოიგეს. 4 დუელი მათ შორის ფრედ დასრულდა.
თანაბარი მაჩვენებლების მიუხედავად, სანტიაგო ბერნაბეუს ბინადრები ბაიერნისთვის ნამდვილ უხერხულ მეტოქეებად იქცნენ. თავად განსაჯეთ: მიუნხენელთა უკანასკნელი მოგება თარიღდება 2012 წლით და იმის შემდეგ, რეალმა მოიგო 6 შეხვედრა, 2 თამაშიც ფრედ დასრულდა.
დავუბრუნდეთ "რეკორდმაისტერის" ბოლო გამარჯვებას, რომელიც მოხდა ჩემპიონთა ლიგის 2011/2012 წლების სეზონის ნახევარფინალში. მომავალმა ფინალისტებმა პირველ შეხვედრაში მოიგეს 2:1, საპასუხოში კი იგივე ანგარიშით უკვე მადრიდელებმა იმარჯვეს. დაინიშნა 11-მეტრიანების სერია, რომელშიც "სამეფო კლუბმა" წააგო.
მანუელ ნოიერმა მოიგერია რიკარდო კაკასა და კრიშტიანუ რონალდუს დარტყმები, საბოლოო წერტილი კი სერხიო რამოსის აცილებამ დასვა. როგორც აღვნიშნეთ, ფინალში გავიდა იუპ ჰაინკესის გუნდი, რომელმაც გადამწყვეტ შეხვედრაში წააგო ლონდონის ჩელსისთან, თანაც შინაურ კედლებში.
რაც შეეხებათ სანტიაგო ბერნაბეუს ბინადრებს, ისინი ჩემპიონთა ლიგის ნახევარფინალიდან გამოვარდნენ ზედიზედ მეორედ, 2011 წელს, ბარსელონასთან წაგების შემდეგ. იქამდე, რეალი 1/2 ფინალამდე მიღწევას ზედიზედ 8 სეზონის მანძილზე ვერ ახერხებდა. იმ შეხვედრებში მადრიდელთა რიგებში თამაშობდა ალვარო არბელოაც, რომელიც დღეს უკვე ესპანური გუნდის დამრიგებლის რანგშია.
