![[VIDEO] როცა ბავშვობის ოცნებას 40 წლის ასაკში იხდენ - კასორლასა და ოვიედოს ზღაპარი](/_next/image?url=https%3A%2F%2Flagazzetta-uploads.s3.us-east-1.amazonaws.com%2Fuploads%2Fposts%2FOb2tuM7NZ1pJvBpL7J9QLl4cxmVrkfqY.webp&w=3840&q=75)
ლა ლიგის 2025/2026 წლების სეზონისთვის სეგუნდა დივიზიონიდან აღზევდა შემდეგი სამი გუნდი - გიორგი ქოჩორაშვილის ლევანტე, ელჩე და ოვიედო. პირველი ორი კლუბი პრიმერა დივიზიონში მოხვდა ავტომატურად, 1-2 პოზიციით ლა ლიგა 2-ში, მე-3 კლუბის აღზევება კი ნამდვილად ფილმის სცენარს ჰგავს.
საქმე ისაა, რომ ასტურიელებს ლა ლიგაში აღზევების საკითხში ულიდერა 40 წლის სანტი კასორლამ, რომლისთვისაც მშობლიური გუნდის პრიმერა დივიზიონში ხილვა ბავშვობის ოცნება იყო. ესპანელი ფლეიმეიქერი მოზარდობაში ირიცხებოდა სწორედ "კარბაიონესის" აკადემიაში, მაგრამ მთავარ გუნდში თამაშის ბედნიერება იმ დროს მას არ ჰქონია.
კარლოს ტარტიერეს ბინადრების აღზრდილი გამთამაშებელი ადრეულ ასაკში გაიყიდა ვილიარეალში, რის შემდეგაც მან მოიარა კიდევ რამდენიმე კლუბი, მათ შორის არსენალიც. მშობლიურ ოვიედოში დაბრუნება კი კასორლას კარიერაში მოხდა 38 წლის ასაკში და მან მომენტალურად დაისახა მიზნად პრიმერაში აღზევება.
მისია შესრულებულია - მირანდესის დამარცხებით, ასტურიელებმა პირველად 2001 წლის შემდეგ, ლა ლიგის საგზური მოიპოვეს. ესპანელმა ფლეიმეიქერმა მიმდინარე სეზონის 35 შეხვედრაში შეაგდო 5 ბურთი და ცნობისთვის, მან პლეიოფშიც გაიტანა. ასეთია სანტისა და "კარბაიონესის" ზღაპარი.
კარლოს ტარტიერეს ბინადრებს არასდროს მოუგიათ ესპანეთის მთავარი ტიტულები და როგორც აღვნიშნეთ, ლა ლიგაში ისინი 2001 წლის შემდეგ არ ყოფილან. "მეთოფეების" ყოფილი ფლეიმეიქერის გარდა, ოვიედოში სხვადასხვა დროს უთამაშიათ ლუის არაგონესს, რობერტ პროსინეჩკის, მიჩუ პერესს, ხუან მატასა და სხვებს.
ცნობისთვის, 2020/2021 წლების სეზონში ასტურიელების წევრი იყო გიორგი აბურჯანიაც, რომელმაც აღნიშნულ გუნდში ოთხი მატჩის ჩატარება მოასწრო. ქართველი შუახაზელი "კარბაიონესში" გადავიდა სევილიას სარეზერვო გუნდიდან და მას აკავშირებდა 1-წლიანი კონტრაქტი, მაგრამ სეზონის მეორე ნახევარში ის უკვე კარტახენაში აღმოჩნდა.
