2024/25 სეზონის დასასრულს უახლოვდება. ტოპ 5 ლიგაში პრემიერ ლიგის, ლა ლიგის, ბუნდესლიგისა და ლიგა 1-ის ჩემპიონები უკვე გამოვლინდნენ, ინტრიგა კი მხოლოდ სერია ა-შია დარჩენილი, სადაც სკუდეტოსთვის ნაპოლი და ინტერი იბრძვიან. წინ გველოდება ჩემპიონთა ლიგის, ევროპა ლიგისა და კონფერენს ლიგის ფინალებიც, რასაც მომდევნო თვეში მსოფლიოს საკლუბო ჩემპიონატიც მოჰყვება.
ვინ მოიგებს 2025 წლის ოქროს ბურთს? გთავაზობთ უცხოური მედიის პროგნოზებს.
ამ თემაზე სულ უფრო და უფრო მეტს საუბრობენ, რაც ლოგიკურია, რადგან ბოლო წლებისგან განსხვავებით, წელს რამდენიმე ფავორიტი გვყავს. გავლენიანი უცხოური მედიის პროგნოზით, პსჟ ჩემპიონთა ლიგის მოგებას თუ მოახერხებს, 2025 წლის ოქროს ბურთის მთავარი ფავორიტი უსმან დემბელე იქნება. 28 წლის ფრანგი ფეხბურთელის ანგარიშზე ამ სეზონში 33 გოლი და 13 საგოლე გადაცემაა. უსმან დემბელეს შემდეგ, ხუთეული კი ასე გამოიყურება: ლამინ იამალი, რაფინია, მო სალაჰი და ჯანლუიჯი დონარუმა.
განიხილება მეორე ვარიანტიც — პსჟ ჩემპიონთა ლიგის მოგებას თუ ვერ მოახერხებს, ოქროს ბურთის გამარჯვებული აუცილებლად ბარსელონას ფეხბურთელი გახდება, რაც იმას ნიშნავს, რომ საუკეთესოდ რაფინიას ან ლამინ იამალს დაასახელებენ. ბრაზილიელმა ამ სეზონში 34 გოლი გაიტანა, რასაც 25 საგოლე გადაცემაც დაუმატა. რაც შეეხება 17 წლის უნიჭიერეს ესპანელს, იამალის ანგარიშზე 17 გოლი და 25 საგოლე გადაცემაა.
იმის მიუხედავად, რომ ინტერმა ჩემპიონთა ლიგის ფინალში გასვლა მოახერხა, გავლენიანი გამოცემები "ნერაძურის" ფეხბურთელებს ხუთეულში მაინც არ ასახელებენ.
