კლაუდიო რანიერი მიმდინარე სეზონის დასრულების შემდეგ რომას 100% დატოვებს. გადაწყვეტილება საბოლოოა და გადახედვას აღარ ექვემდებარება. "ჯალოროსი" ახალ მთავარ მწვრთნელს უკვე ეძებს, მთავარი სამიზნე კი ცნობილია.
ნუნუ ეშპირიტუ სანტუ — დიახ, 51 წლის სპეციალისტი რომას მთავარი სამიზნეა! იტალიურ კლუბსა და პორტუგალიელ მწვრთნელს შორის პირველი კონტაქტი უკვე შედგა, მეტიც, "ჯალოროსი" გამოცდილ მწვრთნელს მინიმუმ 2-წლიან კონტრაქტსა და საკმაოდ საინტერესო პროექტს სთავაზობს.
როგორც ირკვევა, ნუნუ ეშპირიტუ სანტუ ნოტინგემ ფორესტის დატოვებას სერიოზულად განიხილავს და ამის მთავარი მიზეზი, კლუბის მფლობელთან დაპირისპირება სახელდება. შესაბამისად, რომაში ამის შესახებ კარგად იციან, სწორედ ამიტომ იტალიელები ამ გარიგებაზე უკვე მუშაობენ. განიხილება სხვა კანდიდატებიც — ჯან პიერო გასპერინი, სტეფანო პიოლი, ფრანჩესკო ფარიოლი, მასიმილიანო ალეგრი, დიახ, ყველა ეს სპეციალისტი რომაელთა სიაში არიან, თუმცა ამ მომენტისთვის არც ერთი მათგანი მთავარი სამიზნე არაა.
რაც შეეხება ბოლო საათებში გავრცელებულ ინფორმაციას, რომელიც იურგენ კლოპსა და რომას უკავშირდება. ამ თემასთან დაკავშირებით გერმანელი სპეციალისტის აგენტმა კომენტარი უკვე გააკეთა, სადაც ამ სიახლეს დიდი ტყუილი უწოდა. იტალიურ კლუბსა და იურგენ კლოპს შორის არანაირი მოლაპარაკებები არ მიმდინარეობს. 57 წლის მწვრთნელი რედ ბულის ორგანიზაციის დატოვებას არ გეგმავს.
უახლოეს კვირებში, რომასთან დაკავშირებით უფრო მეტი ინფორმაცია გახდება ცნობილი.
