პრეზენტაციას ძამბროტა, კახა კალაძე და სხვა ვეტერანი ფეხბურთელები დაესწრნენ. პრეზენტაციამდე კი საშუალება მოგვეცა ძამბროტასთან პირადად გვესაუბრა და ინტერვიუ ჩაგვეწერა.
როგორც მოედანზე, ისე მოედნის გარეთ, ძამბროტას პროფესიონალიზმი, დახვეწილობა და იტალიური ხასიათი ეტყობა, კარგი მოსაუბრეა და ცდილობდა, ყველა კითხვაზე ამომწურავი პასუხები გაეცა. გასაკვირი არაა, რომ თითქმის ყველა კითხვაზე პასუხის დროს, ის 2006 წელს იხსენებდა, როცა კარიერის ყველაზე დიდ წარმატებას მიაღწია და იტალიასთან ერთად მსოფლიო ჩემპიონი გახდა. ეს მომენტი მის მეხსიერებაში წარუშლელია.
ძამბროტას თამაში ისეთ ეპოქაში მოუწია, როცა მსოფლიო ფეხბურთში თავს უამრავი ვარსკვლავი იყრიდა და ე.წ. "ოქროს ეპოქადაცაა" წოდებული, უამრავი მაღალი დონის თავდამსხმელი იყო, მაგრამ კითხვაზე, თუ ვინ იყო მისთვის ყველაზე რთულად შესაჩერებელი მეტოქე, ჯანლუკამ ასეთი პასუხი გაგვცა:
"ასეთი ბევრი იყო, მაგრამ გამოვარჩევდი ჰოლანდიელ ფეხბურთელს ზენდენს. ერთხელ, მის გამო შემცვალეს კიდეც."
2-ჯერ მოგებული სერია ა, ერთი სუპერკოპა, ჩემპიონთა ლიგის ფინალი და ინტერტოტოს თასი - ეს ის მიღწევებია, რომლებიც ძამბროტას იუვენტუსში ჰქონდა. იტალიელის თქმით, კარიერის ყველაზე კარგი პერიოდი სწორედ "ბებერ ქალბატონში" ჰქონდა, მაგრამ ყველაზე დიდი იმედგაცრუებაც ამ გუნდში განიცადა...
"კარიერის ყველაზე დიდი იმედგაცრუება 2 მაქვს: პირველი, 1999 წელს იუვენტუსთან ერთად წაგებული სერია ა და 2000 წელს ევროპის ჩემპიონატის ფინალის მარცხი საფრანგეთთან."
კითხვაზე, თუ ვინ იყო გასახდელში ყველაზე მხიარული თანაგუნდელი, ძამბროტას ბევრი არც უფიქრია და 2 მოთამაშე გამოარჩია - ანტონიო კასანო და რობინიო. კასანო რომ, ევროპის მაშტაბით, თავისი მხიარული და არაორდინალური ხასიათით არის ცნობილი, ისედაც ვიცოდით. რობინიო და კასანო ძამბროტას თანაგუნდელები მილანში იყვნენ.
"ხვიჩა კვარაცხელია არის ნამდვილი ტალანტი, იმავეს ვამბობდი ლიონელ მესიზეც, როდესაც ის ბარსელონაში პირველად მოვიდა" - იტალიური ფეხბურთის ლეგენდასთან საუბრისას, რთული იყო ხვიჩა კვარახცელიასთვის აგვევლო გვერდი, რომელიც სერია ა-ს სეზონის საუკეთესო ფეხბურთელია. როგორც გაირკვა, ძამბროტა მის მატჩებს ხშირად ესწრება. ვეტერანმა ფეხბურთელმა კვარას მიმართ საქებარი სიტყვები არ დაიშურა და იმით გამოარჩია, რომ ბეწვის ხიდზე გავლა უყვარს.
ვინ არის ყველა დროის საუკეთესო ფეხბურთელი?
"კონკრეტულად ერთი ფეხბურთელის გამოყოფა რთულია, რადგან სხვადასხვა ეპოქას თავისი გამორჩეული ფეხბურთელი ჰყავდა. ამიტომ, ამ კითხვაზე პასუხს ეპოქებად დავყოფ - პელე, მარადონა და მესი."
როგორც თავში აღვნიშნეთ, ძამბროტას გონებაში კვლავ 2006 წლის მსოფლიო ჩემპიონატის ტრიუმფი ტრიალებს და ტოპ 11 ფეხბურთელის სიმბოლური გუნდის დასახელების დროს, მან 11-ეულში ყველა ის ფეხბურთელი შეიყვანა, ვისთან ერთადაც 18 წლის წინ მუნდიალი მოიგო. შეგახსენებთ, რომ ამ წელს ძამბროტა ფიფას წლის საუკეთესო გუნდშიც მოხვდა.
ინტერვიუს ბოლოს, ძამბროტამ ხელმოწერები დაარიგა, სამახსოვრო ფოტოები გადაიღო და დღის მთავარი ღონისძიებისკენ აიღო გეზი, სადაც ყოფილი თანაგუნდელი და მეგობარი, კახა კალაძე დახვდა.
La gazzetta dello Sport Georgia უკვე საქართველოშია და ჩვენთან ყოველდღიურად შეგიძლიათ გაეცნოთ დღის მთავარ სპორტულ მოვლენებს.
