ვინისიუს ჟუნიორი კვლავ რასისტული სკანდალის ეპიცენტრშია, ამჯერად ჩემპიონთა ლიგის პლეიოფში, ლისაბონის ბენფიკასთან მატჩში. გავიხსენოთ თითოეული შემთხვევა, როცა ბრაზილიელი ფორვარდი მსგავსი პრობლემის წინაშე აღმოჩენილა.
2022 წლის სექტემბერი - მადრიდული დერბი ატლეტიკოსთან, ვინისიუსს მეტოქე გუნდის გულშემატკივრების ტრიბუნიდან რასისტული შეძახილები ესმის. საქმე დარჩა გაუხსნელი, რადგან დამნაშავეთა იდენტიფიცირება ვერ მოხერხდა.
2023 წლის იანვარი - კვლავ შემთხვევა ატლეტიკოსთან. ესპანეთის დედაქალაქის ერთ-ერთ ქუჩაზე გაჩნდა ხიდზე ჩამოკიდებული თოჯინა ვინის სახელითა და სათამაშო ნომრით. დააკავეს 4 მადრიდელი ქომაგი, რომლებსაც პირობითი სასჯელი მიუსაჯეს.
2023 წლის თებერვალი - ვინისიუსს რასისტული შეძახილები ამჯერად რეალ მალიორკას გულშემატკივრებისგან ესმის. ის თხოვს მატჩის არბიტრს რეაგირებას, მაგრამ 2022 წლის სექტემბრის შემთხვევის მსგავსად, დამნაშავეთა იდენტიფიცირება ვერ მოხერხდა.
2023 წლის მაისი - ვალენსიასთან მატჩი, ერთ-ერთი ყველაზე ცნობილი რასისტული სკანდალი ვინისიუსის კარიერაში. ვარსკვლავურმა ბრაზილიელმა ფორვარდმა "ღამურების" ქომაგებზე მსაჯს რამდენჯერმე მიუთითა. შეხვედრა შეჩერდა და უკვე ფეხბურთელებს შორის დაპირისპირებით განახლდა.
რასისტული შეძახილებით გაბრაზებულმა ჟუნიორმა შეხლა-შემოხლის დროს "ლოს ჩესის" ერთ-ერთ ფეხბურთელს ხელი ჰკრა, რის გამოც მსაჯმა ის დასაჯა და მოედნიდან გააძევა. მანამდე, მადრიდის რეალის ფორვარდის ჩხუბის ეპიზოდში გიორგი მამარდაშვილიც ჩაერთო, რის გამოც მან გაფრთხილება მიიღო.
მოგვიანებით, ქართველმა მეკარემ "სამეფო კლუბის" შვიდიანთან დაპირისპირება იმით ახსნა, რომ მისგან თანაგუნდელის შეურაცხყოფა ვერ მოითმინა. მესტალიას ბინადრების იმდროინდელმა გოლკიპერმა რასიზმი დაგმო და 25 წლის ფორვარდს მხარდაჭერაც გამოუცხადა. რაც შეეხებათ ვალენსიას რასისტულად განწყობილ ფანებს, მათ 8-თვიანი პატიმრობა მიესაჯათ.
მოგვიანებით, ეს სასჯელი შეცვლილი იქნა პირობითი სასჯელითა და სტადიონზე დასწრების ორწლიანი აკრძალვით. იმ მატჩის დასრულების შემდეგ, ვინიმ ღიად გააკრიტიკა ესპანურ ფეხბურთში არსებული სისტემა და ქვეყანას ცვლილებებისკენ მოუწოდა.
2024 წლის აპრილი - ოსასუსანთან მატჩი და კვლავ რასისტული შეძახილები ჟუნიორის მისამართით. თამაშის მთავარ არბიტრს რეაგირებისკენ მოუწოდებენ დანი კარვახალი და ანტონიო რუდიგერი, მაგრამ ის მათ მოთხოვნას ყურადღებას არ აქცევს.
2025 წლის აპრილი - კვლავ ვალენსიასთან მატჩი. ვინისიუსს ამჯერად კონფლიქტი მოუვიდა სტოლე დიმიტრიევსკისთან, იმის გამო, რომ მოწინააღმდეგე გუნდის გოლკიპერმა მას დასცინა. აღნიშნულ შეხვედრაში ბრაზილიელი ფორვარდი მსაჯსაც დაუპირისპირდა.
2025 წლის მაისი - ელ კლასიკო კოპა დელ რეის ფინალში. ვინისიუსი მთელი მატჩის განმავლობაში იყო უკმაყოფილო, როგორც ბარსელონას ქომაგების შეძახილებით, ისე მსაჯობითაც. ბრაზილიელი ფორვარდი მოექცა ყურადღების ცენტრში, მაგრამ რუდიგერის ყინულის სროლამ რეფერის მიმართულებით, ყველაფერი გადაფარა.
2026 წლის თებერვალი - ვინისიუსი იტანს ულამაზეს გოლს ბენფიკას კარში, რის შემდეგაც მეტოქე გუნდის გულშემატკივრების წინაშე გამომწვევად ზეიმობს. რა მოხდა შემდეგ? ლისაბონელები ცენტრიდან თამაშის განახლებას აპირებდნენ, როცა ბრაზილიელ ფორვარდსა და ჯანლუკა პრესტიანის შორის შელაპარაკება მოხდა.
ჟუნიორი არბიტრთან მივიდა და აღნიშნა, რომ მას რასისტული შეურაცხყოფა მიაყენეს, რის გამოც მატჩი რამდენიმე წუთით გაჩერდა. კადრებში ჩანს, რომ არგენტინელი ვინგერი სახეზე მაისურს იფარებს და რეალის ფორვარდს მიმართავს, რასაც მისი რეაქცია მოჰყვა. შეხვედრის შემდეგ, მადრიდელთა მე-7 ნომერმა განაცხადა, რომ ჟოზე მოურინიოს გუნდის ფლანგელმა მას მაიმუნი უწოდა, მაგრამ მოწინააღმდეგე ბრალდებას უარყოფს.
