საქართველოს ფუტსალის ნაკრებმა 2026 წლის ევროპის ჩემპიონატზე დღეს ხორვატიასთან ფრედ 2-2 ითამაშა და მიმდინარე ევროპირველობაზე პირველი ქულა მოიპოვა.
მატჩის საუკეთესო მოთამაშე, 33 მოგერიებული ბურთით,ქართველთა მეკარე ალი ასლანი გახდა.
შეხვედრის შესახებ საქართველოს ფუტსალის ნაკრების მთავარმა მწვრთნელმა, ავთანდილ ასათიანმა და ნაკრების წევრებმა ისაუბრეს:
ალი ასლანი:"ხორვატია ძალიან კარგი გუნდია, ტოპ დონის მოთამაშეები ყავთ, ძალიან რთული თამაში გამოვიდა. ფუტსალი გუნდური სპორტია, ერთ მოთამაშეზე არაა დამოკიდებული. მადლობას ვეტყვი ჩემს გუნდელებს, ძალიან დამეხმარნენ. რაც შეეხება მორიგ მატჩს, საფრანგეთი ძალიან ძლიერი გუნდია, დიდ პატივს ვცემთ, თუმცა ჩვენი ბოლო შანსია და მოგება გვინდა, ჩვენ ყველაფერს გავაკეთებთ, რომ გავიმარჯვოთ და ქართველი ხალხი გავახაროთ."
გიორგი ღავთაძე: "მინდა ავღნიშნო ჩვენი მეკარის, ალი ასლანის თამაში, რომელმაც ძალიან ბევრი ბურთი მოიგერია, ვფიქრობ, დღეს უფრო გვეტყობოდა გუნდურობა, ბრძოლა, ვიდრე წინა თამაშში, გვინდოდა რაღაც გამოსულიყო და შანსები შეგვენარჩუნებინა, საფრანგეთთანაც თუ ასე ვითამაშებთ ჯგუფიდან გასვლის შანსი გვექნება."
ვახტანგ ჯვარაშვილი: "დადებითად შევაფასებ ამ თამაშს, ეს ქულა მნიშვნელოვანი იყო ჩვენთვის პირველი მატჩის შემდეგ, დაველოდებით მორიგ თამაშს და იმედი გავქვს, შევძლებთ გამარჯვებას და მორიგ ეტაპზე გასვლას."
ვახტანგ კეკელია:"ხორვატიასთან ქულის აღება რა თქმა უნდა, მნიშვნელოვანია, დიდ მოტივაციას გვაძლევს შემდეგი თამაშისთვის, რადგან ჯგუფიდან გასვლა შეგვიძლია."
ავთანდილ ასათიანი: "ამაყი ვარ ჩვენი ნაკრებით, ამ თამაშით გამოჩნდა, რომ პირველ მატჩში წაგება შემთხვევითობა იყო. ჩანს რომ ქართული ფუტსალი სწორ გზაზეა, ხორვატიის ნაკრები მსოფლიოში ერთ-ერთი საუკეთესო ნაკრებია. ჩვენ ნაკრებს შეუძლია მაღალ მიზნებზე იფიქროს. მიხარია, რომ ალიმ ამ გუნდში თავი იპოვა და დღევანდელ თამაშში საუკეთესო იყო, მას ბიჭებმა შეუწყვეს ხელი, წარმატება ერთიანობით მიიღწევა."
საქართველოს ფუტსალის ნაკრები ევროპის ჩემპიონატზე ჯგუფური ეტაპის ბოლო მატჩს 28 იანვარს, ლიეტუვის ქალაქ კაუნასში საფრანგეთის ნაკრებთან გამართავს.
ფოტო: საქართველოს ფეხბურთის ფედერაცია
