ყველაზე ხანგრძლივი მოგებათა სერია ყველა ტურნირზე ერთად
ევროპის ტოპ 5 ლიგის წარმომადგენელი: დრესდნერი (26 მოგება, 1942-1943), ბაიერნი (23 მოგება, 2019-2020; 2020-2021)
ზოგადად: უიპეშტი (30 მოგება, 1945-1946)
საუბარია მხოლოდ გამარჯვებებზე და ამ მხრივ რეკორდსმენი არის იუპეშტი - უნგრეთის ერთ-ერთი ყველაზე ტიტულოვანი გუნდი. რაც შეეხებათ ევროპის ტოპ 5 ლიგის წარმომადგენლებს: დრესდნერი, რომელიც გერმანიაში გასული საუკუნის 40-იან წლებში ბრწყინავდა. უფრო თანამედროვე მაგალითებისთვის მივდივართ კვლავ ბუნდესლიგაში: ვინ, თუ არა ბაიერნი, თავისი ზედიზედ 23 მოგებით.
ყველაზე ხანგრძლივი მოგებათა სერია მხოლოდ შიდა ჩემპიონატში
ევროპის ტოპ 5 ლიგის წარმომადგენელი: დრესდნერი (23 მოგება, 1942-1943), ბაიერნი (19 მოგება, 2013-2014)
ზოგადად: ფერენცვაროში (32 მოგება, 1930-1931; 1932-1933)
კიდევ ერთი გერმანულ-უნგრული რეკორდი. ფერენცვაროში იმარჯვებდა ზედიზედ 32 შეხვედრის განმავლობაში, თანაც ამ გუნდმა ეს მიღწევა 30-იანი წლების დასაწყისში 2-ჯერ დააფიქსირა. ევროპის ტოპ 5 ლიგა: ისევ დრესდნერი, თანამედროვე მაგალითებისთვის კი ბაიერნი, სეზონში 2013/14. როგორც ვხედავთ, პეპ გვარდიოლამ მიუნხენში პირდაპირ რეკორდით შეაბიჯა.
ყველაზე ხანგრძლივი წაუგებელი სერია ყველა ტურნირზე ერთად
უეფას ტურნირების დაარსებამდე: სელტიკი (62 წაუგებელი მატჩი, 1915-1917)
უეფას ტურნირების დაარსებიდან: ბენფიკა (48 წაუგებელი მატჩი, 1963-1965), ლევერკუზენი (48 წაუგებელი მატჩი, 2023-დღემდე)
სწორედ აღნიშნული მიღწევა გაიმეორა ლევერკუზენმა და იმის გათვალისწინებით, რომ სეზონი ჯერ არ დასრულებულა, არაა გამორიცხული, მალე ერთპიროვნული რეკორდსმენი ვიხილოთ. ბაიერს სათამაშო აქვს 2 მატჩი ბუნდესლიგაში, საპასუხო მატჩი ევროპა ლიგის 1/2 ფინალში (ფინალში გასვლის პერსპექტივით) და გერმანიის თასის ფინალი.
ყველაზე ხანგრძლივი წაუგებელი სერია მხოლოდ შიდა ჩემპიონატში
ევროპის ტოპ 5 ლიგის წარმომადგენელი: მილანი (58 წაუგებელი მატჩი, 1991-1993)
ზოგადად: სტიაუა (104 წაუგებელი მატჩი, 1986-1989)
სტიაუას რეკორდი მართლაც შთამბეჭდავია - რუმინული ფეხბურთის მთავარი ფლანგმანი შიდა ჩემპიონატში სამი წლის განმავლობაში არ მარცხდებოდა. ბუქარესტელები თავს კომფორტულად ევროპაშიც გრძნობდნენ: 1986 წელს მოგებული ჩემპიონთა თასი და 3 წლის შემდეგ, კიდევ ერთი ფინალი, მაგრამ ამჯერად მილანთან წაგება.
სწორედ "როსონერიმ" დაასრულა "სამხედროთა" ოქროს ეპოქა, რითაც მოგვიანებით უკვე თავის ოქროს ეპოქაში შეაბიჯა. 80-იანების მიწურულიდან - 90-იანების შუა პერიოდამდე, "შავ-წითლები" კალჩოსა და ევროპაში პრაქტიკულად უკონკურენტოები იყვნენ. 58-მატჩიანი წაუგებელი სერიაც სწორედ მაშინ დაფიქსირდა.
ყველაზე ხანგრძლივი წაუგებელი სერია შიდა ჩემპიონატის შინაურ მატჩებში
ევროპის ტოპ 5 ლიგის წარმომადგენელი: რეალი (121 წაუგებელი მატჩი შინ, 1957-1965)
ზოგადად: ცრვენა ზვეზდა (130 წაუგებელი მატჩი შინ, 2017-დღემდე)
ევროპულ ფეხბურთში უკანასკნელი შვიდი წლის განმავლობაში შეიცვალა ბევრი რამ, თუმცა ერთი რამ დარჩა უცვლელი - ცრვენა ზვეზდას სერბეთის ლიგის შინაურ მატჩში წაგება ჯერ კიდევ არ აქვს. რეკორდის განახლება გადადებულია შემდეგი სეზონისთვის, რადგან 2023/24 წლების სეზონი სუპერ ლიგაში უკვე დასრულდა.
ტოპ 5 ლიგის წარმომადგენლებს შორის კი სახლში წაგება რვა წლის განმავლობაში რეალმა არ იცოდა. მიუხედავად იმისა, რომ 60-იან წლებში ჩემპიონთა თასზე მადრიდელების გარდა ბრწყინავდნენ უკვე სხვა კლუბებიც, პრიმერა დივიზიონში ეს გუნდი რეკორდების დამყარებას მაინც აგრძელებდა. 121 წაუგებელი მატჩი შინ, ეს "სამეფო კლუბია".
