ჩემპიონთა ლიგის ფაზის წილისყრამ პარის სენ-ჟერმენის მომავალი რვა მოწინააღმდეგის ვინაობა გამოავლინა. ყველა ერთხმად თანხმდება იმ აზრზე, რომ ევროპის მთავარ საკლუბო ტურნირზე მონაწილე გუნდებს შორის, ყველაზე რთული გრაფიკი სწორედ მოქმედ ჩემპიონ პსჟ-ს აქვს.
თავად განსაჯეთ - "ლურჯ-წითლების" რვა მოწინააღმდეგიდან შვიდი, ევროპის ტოპ ხუთი ჩემპიონატიდან არის. მეტოქეების სია ასეთია - ბაიერნი, ბარსელონა, ტოტენჰემი, ლევერკუზენი, ატალანტა, ნიუკასლი და ბილბაო. ის ერთადერთი კლუბი არა ტოპ 5 ლიგიდან ლუის ენრიკეს შეგირდების გზაზე გიორგი ქოჩორაშვილის სპორტინგ ლისაბონი არის.
ჩემპიონთა ლიგის ფაზის გასულ სეზონში იყო ორი გუნდი შვიდი მოწინააღმდეგით ტოპ ხუთი ლიგიდან - მადრიდის რეალი და ლივერპული, წელს კი როგორც აღვნიშნეთ, პარკ დე პრენსის ბინადრები ერთადერთები არიან. აქვე დავამატებთ, ევროპის მთავარი საკლუბო ტურნირი სტარტს 16 სექტემბერს აიღებს.
