ფეხბურთის ისტორიაში ყველაზე საკამათო ჩათვლილი და ჩაუთვლელი გოლები - ჰერსტიდან იამალამდე

2024 წელს რატომ არ არის ლა ლიგაში კარის ხაზის ტექნოლოგია - ცალკე საკითხია და სანამ აღნიშნული ინოვაცია მოაღწევს ესპანეთამდე, გავიხსენოთ ყველაზე საკამათო გოლები წარსულიდან. ფეხბურთში, პრაქტიკულად ყოველდღიურად, გვხვდება სადავო ეპიზოდები და ამიტომ, თითოეული ასეთი მომენტის ჩამოთვლა ძალიან შორს წაგვიყვანს, აქედან გამომდინარე, განვიხილოთ მხოლოდ ყველაზე ეპოქალური შემთხვევები და მთავარი გმირები.

ინგლისის ნაკრების პირველი და ჯერჯერობით, უკანასკნელი მსოფლიო ჩემპიონობა, რომელსაც საკამათო ეპიზოდის გარეშე არ ჩაუვლია. ფინალის ძირითადი დრო ანგარიშით 2:2 დასრულდა, დაინიშნა დამატებითი დრო, რომლის მე-11 წუთზე, ჰერსტმა შეასრულა ის ცნობილი დარტყმა, რითაც მთელი სამყარო საგონებელში ჩააგდო.

ბურთი მოხვდა ზედა ძელს, შემდეგ კი დაეცა კარის ხაზზე (ან გადაკვეთა ის). შეხვედრის მთავარი მსაჯი, გოთფრიდ დინსტი, ვერ იღებდა საბოლოო გადაწყვეტილებას, ამიტომ დასახმარებლად გვერდითა არბიტრს მიმართა, ტოფიქ ბაჰრამოვს. ლაინსმენმა დაადასტურა გოლის გასვლა და სამყარო ორ ნაწილად გაყო.

ალბათ, ეს იყო ყველაზე ცნობილი შეხვედრა მარადონას კარიერაში და ყველაზე გამორჩეული ინდივიდუალური პერფომანსი ფეხბურთის ისტორიაში. მან აღნიშნულ მატჩში გაიტანა "საუკუნის გოლი", იქამდე 4 წუთით ადრე კი მაყურებელმა "ღმერთის ხელი" იხილა. არგენტინის შეტევის მსვლელობისას დიეგომ პიტერ შილტონთან საჰაერო ორთაბრძოლისას ბურთი კარში ხელით გადაგზავნა.

შეხვედრის მთავარმა მსაჯმა, ალი ბინ ნასერმა გოლი ჩათვალა, რადგან მან არგენტინელი შემტევის მხრიდან წესების დარღვევა ვერ შენიშნა. მოგვიანებით, "ალბისელესტეს" ლეგენდარული კაპიტანი არაერთხელ დაადასტურებს ხელის გამოყენებას და იხუმრებს, რომ მიზნის მიღწევაში მას ღმერთი დაეხმარა. ამ გოლმა და ზოგადად მატჩმა, კიდევ უფრო გაამწვავა ორ ქვეყანას შორის არსებული პოლიტიკურ-სოციალური კონფლიქტი.

ორი დეკადის შემდეგ, ლეგენდარული ათიანის არტისტიზმს გაიმეორებს ლიონელ მესიც, თუმცა მასშტაბი უფრო მცირე იქნება. 2007 წელი, ლა ლიგა - არგენტინელი შემსრულებელი, ასევე ხელის გამოყენებით, იღებს ბარსელონას მოსისხლე მტრის, ესპანიოლის კარს. ცხადია, ყველას მომენტალურად "ფეხბურთის უგვირგვინო მეფის" სკანდალური მომენტი გაახსენდა.

აღნიშნულმა ეპიზოდმა უდიდესი როლი ითამაშა ლივერპულის ჩემპიონთა ლიგის ფინალში გასვლასა და სტამბულური სასწაულის მოხდენაში. პირველ მატჩში დაფიქსირდა უგოლო ფრე, საპასუხო თამაშში კი ყველაფერი სწორედ ამ მომენტმა გადაწყვიტა. საუბარია გარსიას მიერ მე-4 წუთზე გატანილ "გოლ მოჩვენებაზე".

რთული სათქმელია გადაკვეთა თუ არა ბურთმა ხაზი, მაგრამ მსაჯმა გოლი ჩათვალა. ამ დაპირისპირებაში ფავორიტად ჩელსი მოიაზრებოდა, რომელიც მერსისაიდელებს პრაქტიკულად ყველა კომპონენტში ჯობდა. ფინალში გასვლასაც სწორედ ლონდონელებს უწინასწარმეტყველებდნენ, მაგრამ საფეხბურთო ფორტუნა "წითლებისკენ" გადაიხარა.

გოლი, რომელმაც საფრანგეთი სამხრეთ აფრიკაში გამართულ მსოფლიო ჩემპიონატზე გაიყვანა. მუნდიალზე გასვლამდე, ამ გუნდს უწევდა პლეიოფის გავლა, სადაც მეტოქე ირლანდია იყო. პირველი მატჩი "მამლების" მოგებით, ანგარიშით 1:0 დასრულდა, საპასუხო თამაშის ძირითად დროში კი იმავე ანგარიშით უკვე "კელტებმა" იმარჯვეს.

დაინიშნა დამატებითი დრო, რომლის 103-ე წუთზე, ანრიმ ხელის გამოყენებით საგოლე გადაცემა გაუკეთა უილიამ გალასს, რომელმაც თავის მხრივ ანგარიშიც გაათანაბრა. 2:1 ორი მატჩის ჯამში, მუნდიალის საგზურს "ლურჯები" იგებენ. რა მოხდა უშუალოდ ტურნირზე? მხოლოდ 1 მოპოვებული ქულა და ბოლო ადგილი ჯგუფში. რთული სათქმელია, რამდენად უღირდა ეს ყველაფერი ტიერის.

ანგარიში ერთი შეხედვით იმახე მიგანიშნებს, რომ ინგლისი განადგურდა, თუმცა აღნიშნული შეხვედრის სცენარი შესაძლოა სულ სხვანაირი ყოფილიყო. მაშინ, როდესაც ტაბლოზე ჯერ კიდევ 2:1 ციმციმებდა და "3 ლომს" ბურთი ჰქონდა ახალი გატანილი, ფრენკ ლამპარდმა გადაწყვიტა საჯარიმოს გარედან დარტყმა, რის შედეგადაც ბურთი მოხვდა ზედა ძელს, შემდეგ კი თითქოს საჯარიმოს ხაზიც გადაიკვეთა.

ბრიტანელთა ქამბექი არ შედგა, რადგან ხორხე ლარიონდამ გოლი არ ჩათვალა. "ბუნდესნაკრებმა" სასოწარკვეთილ მოწინააღმდეგეს მოგვიანებით კიდევ 2 ბურთი გაუტანა, რითაც 1/4 ფინალისკენ გზა გაიკვალა. არსებობს მოსაზრება: ფრენკის გოლი რომ ჩათვლილიყო, მსოფლიოს 1-გზის ჩემპიონები "მანშაფტს" კიდევ უფრო მეტ პრობლემას შეუქმნიდნენ.

ყატარში გამართული მსოფლიო ჩემპიონატის E ჯგუფში სრული არეულობა სუფევდა. მესამე ტურისთვის მერვედფინალში გასვლის შანსს ინარჩუნებდა კვარტეტის ოთხივე გუნდი და უნდა ითქვას, რომ იაპონიას სხვებზე მეტად გაუმართლა. ამ ნაკრებმა დაამარცხა ესპანეთი და გამარჯვების მომტანმა ბურთმა დიდი რეზონანსი გამოიწვია.

მიტომას საგოლე გადაცემით ისარგებლა აო ტანაკამ, თუმცა ნათლად ჩანდა, რომ პასის გაკეთების ეპიზოდში ბურთს მოედნის ფარგლები გადაკვეთილი ჰქონდა. ეს მომენტი გადამოწმდა VAR-ზე, მაგრამ ამის მიუხედავად, გოლი ჩაითვალა. "სამურაებმა" 6 ქულით ჯგუფში პირველი ადგილი დაიკავეს, აჯობეს "ფურია როხას", გერმანია და კოსტა-რიკა კი შინ გაუშვეს.

ბოლოს კი ცოტა ხნის წინ მომხდარი ეპიზოდი, რომლის შესახებაც უკვე ვისაუბრეთ. დიახ, გერმანია-ინგლისის შეხვედრის მსგავსად, აქაც შეგვიძლია ვთქვათ, რომ გოლის ჩათვლის შემთხვევაში, კლასიკოში სხვა სცენარი დატრიალდებოდა. რეალმა ის მატჩი მოიგო, რის შედეგადაც ბარსელონასთან სხვაობა ამ დროისთვის 11 ქულას შეადგენს.

მადრიდელთა ჩემპიონობას აღარაფერი უშლის ხელს და ცხადია, ფაქტი არ არის, რომ ლამინის გოლით კატალონიელები იმ შეხვედრაში მოიპოვებდნენ გამარჯვებას, უბრალოდ აქ თვალშისაცემია სხვა გარემოება: მსოფლიოს წამყვან ჩემპიონატში არ არის დანერგილი კარის ხაზის ტექნოლოგია, რადგან ხავიერ ტებასის სიტყვებით, ეს საკმაოდ ძვირი სიამოვნებაა.