2026 წლის ზამთრის ოლიმპიური თამაშები საქართველოსთვის ისტორიული აღმოჩნდა. პირველად ჩვენი ქვეყნის ისტორიაში საქართველომ ზამთრის ოლიმპიადაზე მედალი მოიპოვა. ვერცხლის პრიზიორი ფიგურულ ციგურაობაში ლუკა ბერულავასა და ანასტასია მეტელკინას სპორტული წყვილი გახდა.
ზამთრის ოლიმპიური თამაშების შესახებ, LaGazzetta.ge -სთან საქართველოს ეროვნული ოლიმპიური კომიტეტის პრეზიდენტმა, ლერი ხაბელოვმა ისაუბრა:
- გილოცავთ ზამთრის ოლიმპიურ თამაშებზე მიღწეულ ისტორიულ შედეგს, რა მოლოდინი გქონდათ გამგზავრებამდე?
- ის შედეგები რაც ჩვენმა სპორტსმენებმა აჩვენეს ლოგიკური გაგრძელება იყო წინა პერიოდისა, რასაც ჩვენ ამ დროის განმავლობაში ვხედავდით და სიმართლე გითხრათ ველოდი კიდეც. ოლიმპიადამდე მიმოვიხილავდი ნაჩვენებ შედეგებს, განსაკუთრებით ამ წყვილზე ვფიქრობდი, რომ მედლის მოპოვება შეეძლოთ. ხშირად ვამბობ, ოლიმპიური თამაშები არის ფსიქოლოგიური წნეხი და ამ მომენტს ვინც მეტად გაუძლებს ის რჩება გამარჯვებული. პირველად 1994 წელს მივიღეთ მონაწილეობა ზამთრის ოლიმპიადაზე, არც ისე დიდი დროა ეს ზამთრის ოლიმპიადისთვის, რომ ამ შედეგამდე მიხვიდე. გუნდურ შეჯიბრებაში, ფიგურულ ციგურაობაში ვნახეთ, რომ ფინალში გავედით და მეოთხე ადგილი დავიკავეთ, ამ სახეობაში მოწინავე ქვეყნების გვერდით ვართ.
აღსანიშნავია, ზამთრის სახეობების განვითარებისთვის გადადგმული მნიშვნელოვანი ნაბიჯები, შარშან ზამთრის ახალგაზრდულ ოლიმპიურ ფესტივალს ვუმასპინძლეთ, რისთვისაც ყინულის დარბაზები ავაშენეთ, თბილისსა და ბათუმში. ვამბობდით, რომ ჩვენ გვჭირდება ბაზები, მოლოდინი გვქონდა და ოლიმპიურმა კომიტეტმა ფიგურული ციგურაობის ფედერაციასთან ერთად ძალისხმევა ჩავდეთ და ვიცოდით შედეგს მოიტანდა, გახსოვთ ახალგაზრდულ ოლიმპიურ ფესტივალზე ბათუმში ფიგურულ ციგურაობაში ინგა გურგენიძე ჩემპიონი გახდა და ისტორიული მედალი მოუტანა ჩვენ ქვეყანას. ახლა კი მორიგი ისტორია დაიწერა, რისი მოლოდინიც გვქონდა, შედეგების გათვალისწინებით.
- ოლიმპიური დევიზი - უკეთ ვიდრე წინა ოლიმპიადაზე - ამ შემთხვევაში შესრულდა წარმატებით, რა გეგმებს ისახავთ მომავალი ზამთრის ოლიმპიური თამაშებისთვის?
- ახლა შედარებით რთული ამოცანაა, მაგრამ ახალგაზრდა, პერსპექტიული სპორტსმენები გვყავს. ვნახეთ ჩინეთის ოლიმპიადიდან მილანის ოლიმპიადამდე როგორ განვითარდნენ. რა თქმა უნდა, ზამთრის სპორტში შედეგის მიღწევა, შენარჩუნება და გაუმჯობესება რთულია. სპორტსმენისთვის მნიშვნელოვანია ამბიცია და გაწყობა, ეს ჰქონდა, როგორც ლუკას ასევე ანასტასიას და ამიტომაც მივიდნენ ისტორიულ შედეგამდე.
- რა შეფასება მიიღეთ თქვენი უცხოელი კოლეგებისგან?
-მოგეხსენებათ, ჩვენ გუნდში ევროპის ჩემპიონები იყვნენ, შესაბამისად, ჩვენ ქვეყანას ყველა კონკურენტუნარიანად განიხილავდა. ჩვენი სპორტსმენების შედეგს ყველა მილოცავდა, რომ ვამბობდი ეს ჩვენთვის პირველი მედალია და რაოდენ ისტორიულია იზიარებდნენ ჩვენ სიხარულს.
- ამ წარმატების შემდეგ, ზამთრის სპორტის სახეობების განვითარებისთვის განახლებული პროექტის მომზადებას გეგმავთ?
-ჩვენთვის ზამთრის სპორტის სახეობების განვითარება ყოველთვის მნიშვნელოვანი იყო და ძალიან გვიხარია აღნიშნულ შედეგამდე მისვლა, ამ სახეობებში წამყვან ქვეყნებთან ერთად მოვხვდით და ძლიერი კონკურენცია გავუწიეთ. ჩვენ წინა ოლიმპიადებზე ნაჩვენები შედეგები გავაუმჯობესეთ. ახალგაზრდა სპორტსმენების აღზრდა საქართველოში ძალიან მნიშვნელოვანია, ვიცით ნიკა ეგაძე საქართველოში გაიზარდა. ახალა უკვე გვაქვს ინფრარსტრუქტურა თბილისსა და ბათუმში, რაც შესაძლებლობას მოგვცემს მეტი ახალგაზრდა ჩაერთოს ზამთრის სახეობებში და მეტი ტალანტი აღმოვაჩინოთ. თუ საჭირო იქნება, შესაძლებელია მოვიწვიოთ შესაბამისი კვალიფიკაციის მწვრთნელები.
ინტერესი გაზრდილია, თან მოგეხსენებათ, მსგავსი წარმატების ფონზე კიდევ უფრო იმატებს ინტერესი. საზოგადოებას ლიდერები, მისაბაძი ადამიანები სჭირდება, ამ შემთხვევაში ჩვენ უკვე გვყავს ფიგურულ ციგურაობაში ასეთი სპორტსმენები.
ფედერაციასთან ერთად, ახალი მიზანი გვექნება ახალი თაობის აღმოსაჩენად, ზამთრის სპორტის სახეობები მნიშვნელოვანია, ჩვენ შეგვიძლია ტრამპლინიდან ხტომაში წარმატებას მივაღწიოთ, რისი ტრადიციაც გვქონდა.
- ზამთრის სპორტის სახეობებიდან ტრამპლინიდან ხტომას გამოყოფთ?
-დიახ, ბაკურიანში შესაძლოა მოეწყოს შესაბამისი ინფრასტრუქტურა და ახალი წაქაძეები გაიზარდონ. ვფიქრობ, თუ პირობები იქნება წარმატებას მივაღწევთ.
რამდენიმე წლის წინ, რომ გვეთქვა ზამთრის ოლიმპიადაზე ვერცხლის მედალს მოვიპოვებთ, არ დაიჯერებდნენ, ახალა კი ეს ყველაფერი რეალობაა, შემდეგში სწორი მუშაობით, ფიგურულ ციგურაობაში უფრო მეტი წარმატება გვექნება.
მადლობა მინდა ვუთხრა სახელმწიფოს, მათი მხარდაჭერის გარეშე ამ შედეგს ვერ მივაღწევდით, იცით სოლიდური პრემია გამოიყო ოლიმპიური შედეგისთვის და ასეთი მიდგომა სპორტის კიდევ უფრო განვითარებას ხელს უწყობს.
რა თქმა უნდა, ფიგურული ციგურაობის ფედერაციის სწორი მუშაობა მნიშვნელოვანი და გამოსაყოფია, მადლობა მინდა ვუთხრა ყველას, ვინც ამ დროის განმავლობაში ჩვენს გვერდითაა, რა თქმა უნდა მათ შორის მედიას, მათი მხარდაჭერა მნიშვნელოვანია ჩვენთვის და სპორტსმენებისთვის, მადლობა ყველას, ვისაც სჯეროდა ჩვენი.
