ჟოზემ თურქულ გრანდთან კონტრაქტი 2026 წლამდე გააფორმა, ფენერბაჰჩე კი პორტუგალიელს ხელფასის სახით წელიწადში €10.5 მილიონს უხდის. ამ საკმაოდ ძვირადღირებული ხელშეკრულების გარდა, თურქული მედია მოურინიოს 4-თვიან თურქულ თავგადასავალს აჯამებს და პრესაში მის მიერ დახარჯულ თანხას ასაჯაროვებს.
როგორც ირკვევა, ჟოზეს სტამბოლში სახლი არ უყიდია და თურქეთში ჩასვლის პირველივე დღიდან, 5-ვარსკვლავიან სასტუმროში, კერძოდ The Four Seasons Istanbul Bosphorus-ში ცხოვრობს. როგორც თურქული მედია იტყობინება, ჟოზემ სტამბოლში ჩასვლის შემდეგ, სასტუმროში ჯამში €171.000 დახარჯა. ამ თანხაში შედის სასტუმროს საერთოდ ყველა მომსახურება, მათ შორის სამზარეულო, აუზები, სპა და ა.შ. ფენერბაჰჩე მზად იყო ახალი მწვრთნელისთვის სტამბოლში საუკეთესო სახლი ექირავებინა, მაგრამ ჟოზემ სასტუმროში ცხოვრება ამჯობინა.
მოურინიოსთვის სასტუმროში ცხოვრება უცხო ნამდვილად არაა. პორტუგალიელი როდესაც მანჩესტერ იუნაიტედის მთავარი მწვრთნელი იყო, სახლის ყიდვაზე ან ქირაობაზე უარი განაცხადა და ქალაქის ერთ-ერთ სასტუმროში დაბინავდა. იქამდე იყო ლონდონი, რა დროსაც ჩელსის ბაზაზე ცხოვრობდა.
ფაქტია ჟოზე თურქეთში ბედნიერია, თუმცა გუნდმა სეზონის ბოლოს ჩემპიონობა თუ ვერ იზეიმა, შეიძლება ფენერბაჰჩემ მის გაშვებაზე ფიქრი დაიწყოს. ფენერი 12 ტურის შემდეგ, 32 ქულით, მეორე პოზიციაზე იმყოფება და ლიდერ გალათასარაის, 3 ქულით ჩამორჩება.
