ალბანეთის დამარცხების შემდეგ, საქართველოს ეროვნული ნაკრების შემტევმა, ხვიჩა კვარაცხელიამ ადგილობრივ ტელევიზიასთან ისაუბრა.
- მოედანზე ვიყავი როდესაც გოლი გავიტანეთ.
- შენ ხომ მანამდე შეგცვალეს?
- არა მოედანზე ვიყავი და არ აქვს მნიშვნელობა ვინ გაიტანს გოლს. მთავარი გუნდია, რადგან ჩვენი ქვეყნისთვის ვთამაშობთ და ბედნიერები ვართ გამარჯვებით.
- ტაქტიკური თამაში იყო და როგორ მოახერხეთ სასურველი შედეგის მიღწევა?
- ვფიქრობ, რომ ალბანეთი ძლიერი გუნდია და კარგად ითამაშეს. შედარებით ფრთხილად ვიყავით, მომენტებს ვქმნიდით, საბედნიეროდ გოლიც გავიტანეთ და დამსახურებულად მოვიგეთ.
- როგორ შეაფასებ ერთა ლიგის მიმდინარე სეზონს შენი გუნდის გადმოსახედიდან?
- ძალიან კარგად დავიწყეთ, 2-დან 2 თამაში მოვიგეთ და ასე უნდა გავაგრძელოთ. რთული ჯგუფია, საიდანაც ყველას შეუძლია გასვლა და ბოლომდე ბრძოლა უნდა გავაგრძელოთ წარმატების მისაღწევად.
- რა გაძლევს მოედანზე ენთუზიაზმს და ენერგიას?
- პირველ რიგში ჩვენი ქვეყნისთვის ვთამაშობთ, რაც ყველაზე მნიშვნელოვანია. ჩვენ ერთი დიდი ოჯახი ვართ, ერთმანეთის გვერდით თავს კომფორტულად ვგრძნობთ და ჩვენი ქვეყნისთვის ვიბრძვით.












