11 ივნისს დაიწყება 21-წლამდელთა ევროპის ჩემპიონატი, რომლის მონაწილე საქართველოს ნაკრებიც იქნება. ორი წლის წინანდელ გამართულ ტურნირზე ასევე თამაშობდნენ "ჯვაროსნებიც", სადაც მათ მიერ წარმატებით იქნა გადალახული ჯგუფური ეტაპი, 1/4 ფინალში კი როგორც გვახსოვს, მოხდა დასანანი წაგება 11-მეტრიანებში, ისრაელის ეროვნულ გუნდთან.
იმ ტურნირზე თითო გოლი გაიტანა ჩვენი ნაკრების ერთბაშად ხუთმა ფეხბურთელმა - ზურიკო დავითაშვილმა, გიორგი წიტაიშვილმა, საბა საზონოვმა, გიორგი გულიაშვილმა და გიორგი გაგუამ. ვნახოთ, რას იზამს რამაზ სვანაძის გუნდი ამჯერად, სლოვაკეთში გასამართ ახალგაზრდულ ტურნირზე.
21-წლამდელთა მორიგი ევროპის ჩემპიონატის დაწყებამდე, გავიხსენოთ ქართველი ფეხბურთელი, რომელმაც აღნიშნულ ტურნირზე ნამდვილი ფურორი მოახდინა. საუბარია რამაზ შენგელიას შესახებ და მისთვის ტრიუმფალურ ევრო 1980-ზე. ლეგენდარული ფორვარდი 3 გატანილი ბურთით იმ გათამაშების საუკეთესო გოლეადორი გახდა.
ქართველმა თავდამსხმელმა აიღო უძლიერესი იტალიის ნაკრების კარი, რომლის შემადგენლობაში იმ ტურნირზე თამაშობდნენ კარლო ანჩელოტი, ძმები ბარეზები, მაურო ტასოტი და სხვები. საბჭოთა კავშირის ეროვნულმა გუნდმა "სკუადრა აძურას" მოუგო 3:1 და ცნობისთვის, თბილისის დინამოს ფორვარდის გარდა, ფავორიტად შერაცხულ მეტოქეს ვიტალი დარასელიამაც შეუგდო.
სსრკ-ს შემდეგი მოწინააღმდეგე იყო იუგოსლავიის ნაკრები, რომელსაც დინამოს იმდროინდელმა მე-11 ნომერმა ორი მატჩის ჯამში ორი გოლი შეუგდო. დიახ, დაპირისპირებები იმ დროს 2-თამაშიანი იყო. პირველ შეხვედრაში "წითლებმა" მოიგეს შენგელიას ერთადერთი ბურთით, საპასუხოში კი მომავალმა ჩემპიონებმა ბალკანელები 3:0 გაანადგურეს.
ქართველმა თავდამსხმელმა განმეორებით მატჩშიც გაიტანა. რაც შეეხება ფინალს, ვალენტინ ნიკოლაევის მიერ გაწვრთნილმა ნაკრებმა მოუგო გერმანიის ეროვნულ გუნდს, მაგრამ ამჯერად უკვე რამაზის გოლების გარეშე. ამის მიუხედავად, ლეგენდარული ფორვარდი 3 ბურთით ევრო 80-ის საუკეთესო გოლეადორი მაინც გახდა.
საბჭოთა კავშირის ნაკრების თავდამსხმელი დღემდე რჩება ერთადერთ ქართველ ფეხბურთელად, რომელმაც 21-წლამდელთა ევროპის ჩემპიონატზე 3 ბურთი შეაგდო. ვნახოთ, შეძლებს, თუ არა საქართველოს ეროვნული გუნდის ახალგაზრდა თაობა დინამოს ყოფილი მე-11 ნომრის მიღწევის გამეორებას.
