7 ივნისს მადრიდში გაიმართა WOW FC-ის რიგით მე-20 ივენთი, სახელწოდებით La Noche De Los Campeones (ჩემპიონების ღამე). ოთხ ბრძოლაში გაირკვა ქამრის მფლობელთა ვინაობა, დანარჩენ ჩხუბებშიც ბევრი საინტერესო რამ მოხდა. მიმოვიხილოთ, თუ რით არის გამორჩეული The Way Of Warrior-ის პრომოუშენი.
ახალი სახელი MMA-ს სამყაროში
მადრიდში დაფუძნებული ორგანიზაცია, რომელმაც 2019 წლიდან უკვე 20 ივენთის ჩატარება მოასწრო. 9 აგვისტოს გაიმართება WOW-ის შემდეგი ღონისძიება, ამჯერად მარბელაზე. აღსანიშნავია, რომ გასული წლის აგვისტოდან The Way Of Warrior-ის აქციონერი გახდა UFC-ის ჩემპიონი, ილია თოფურია.
"მე და ჩემი გუნდი ძალიან ბედნიერები ვართ ასეთ პერსპექტიულ პროექტზე მუშაობით. ერთობლივი შრომით შევქმნით პლატფორმას, რომელიც დაეხმარება ნიჭიერ ესპანელ მებრძოლებს პროფესიულ ზრდასა და გზის გახსნაში უდიდესი საბრძოლო ორგანიზაციებისკენ."
"დიდი სიხარულით მივესალმებით ილია თოფურიას, როგორც WOW-ის აქციონერს. ეს ალიანსი MMA-ს ესპანეთში ახალ საფეხურზე აიყვანს. თქვენი ნიჭი და ვნება იდეალურად ემთხვევა ჩვენს მისიასა და გეგმებს."
La Noche De Los Campeones
დავუბრუნდეთ WOW-ის მე-20 ივენთს, რომელზეც როგორც აღვნიშნეთ, ოთხი საჩემპიონო ბრძოლა გაიმართა. ჰეჩერ სოსამ ტექნიკური ნოკაუტით მოუგო იამან მჯაჰედს და სუპერმსუბუქი დივიზიონის ქამარი მოიპოვა. ასევე ტექნიკური ნოკაუტით მოიგო უმახან იბრაგიმოვმა, რომლის მეტოქე იგნასიო კაპელა იყო.
ინგლისელი მებრძოლი მსუბუქი წონითი დივიზიონის ჩემპიონი გახდა. კიდევ ერთი ტექნიკური ნოკაუტი - ნიკოლაი გროზდევი ამარცხებს იგნასიო კამპოსს და ქვემსუბუქი დივიზიონის ქამარს ეუფლება. ერთადერთი საჩემპიონო ჩხუბი, რომელშიც არ იყო ნოკაუტი არის ფაბია სინტესისა და დავი სანტოსის დუელი.
ესპანელმა მებრძოლმა მსაჯების ერთსულოვანი გადაწყვეტილებით დაამარცხა თავისი ბრაზილიელი მოწინააღმდეგე და უმსუბუქესი დივიზიონის ქამრის მფლობელი გახდა. The Way Of Warrior-ის მე-20 ღონისძიებაზე იჩხუბა ქვესაშუალო დივიზიონის ქართველმა წარმომადგენელმა, დიმიტრი ბარქაიამაც, რომელმაც მსაჯთა გადაწყვეტილებით ადონაი მოლინას მოუგო.
ალექსანდრე თოფურია და სხვა ქართველი მებრძოლები WOW-ში
UFC-ში გადასვლამდე, ერთი ბრძოლა WOW-ში ალექსანდრე თოფურიამ ჩაატარა. 2023 წლის 20 მაისს გამართულ ივენთზე მან ტექნიკური ნოკაუტით იოჰან სეგასს მოუგო. "ელ კონკისტადორის" გარდა, The Way Of Warrior-ის ეგიდით უჩხუბიათ შოთა აკულაშვილს, მიხეილ გორიაშვილს, ამირან ლიპარტელიანს, კონსტანტინე მაჩაბელს, მერუჟან პალიანსა და როგორც აღვნიშნეთ, დიმიტრი ბარქაიას.
თოფურიას სახით, უკვე ვნახეთ ერთი შემთხვევა, როდესაც ქართველი მებრძოლი WOW-დან UFC-ში გადავიდა. იმედი დავიტოვოთ, რომ მათი რიცხვი სამომავლოდ კიდევ უფრო გაიზრდება, როგორც The Way Of Warrior-ში, ისე მსოფლიოს მთავარ პრომოუშენშიც.
