დღეს გაიმართება ჩემპიონთა ლიგის მერვედფინალის კიდევ ორი მატჩი - ლივერპული ესტუმრება პარის სენ-ჟერმენს, ბარსელონა კი ატლეტიკო მადრიდს მიიღებს. განვიხილოთ, თუ რას უნდა ველოდოთ აღნიშნული შეხვედრებისგან.
პარის სენ-ჟერმენი V ლივერპული | 23:00
პირველი შემთხვევა, როდესაც ჩემპიონთა ლიგის პლეიოფში ერთმანეთს ქართველი ფეხბურთელები უპირისპირდებიან. პარის სენ-ჟერმენი, ხვიჩა კვარაცხელიასთან ერთად ეცდება ევროპის მთავარ საკლუბო ტურნირზე ზედიზედ მეორედ ჩემპიონობას, მაგრამ იქამდე, ჯერ ლივერპულის ბარიერია გადასალახი.
მერსისაიდულმა გუნდმა სეზონის ბოლომდე დაკარგა ალისონ ბეკერი და ამ ფაქტმა შანსი გიორგი მამარდაშვილს გაუხსნა. ახალგაზრდა ქართველ გოლკიპერს უკვე აქვს პლეიოფში თამაშის გამოცდილება, სტამბოლში ჩატარებულ პირველ 1/8 ფინალურ შეხვედრაში გალათასარაისთან, "წითლების" კარში სწორედ ის იდგა.
ენფილდის ბინადრებმა წარმატებით გადალახეს "ლომების" ბარიერი, პარალელურად კი პსჟ-მ ლონდონის ჩელსი გაანადგურა. შეგახსენებთ, ქართველმა ვინგერმა "არისტოკრატებთან" დუელში შეაგდო 3 ბურთი და 1 ასისტიც გააკეთა. დავუბრუნდეთ დღევანდელ შეხვედრას, რომელიც ორივე ლეგიონერისთვის განსაკუთრებული იქნება.
"ლურჯ-წითლებს" უკვე აქვთ არნე სლოტის გუნდის დამარცხების გამოცდილება - ეს მოხდა შარშანდელი სეზონის მერვედფინალში, პენალტების სერიაში. ზოგადად კი აღნიშნული კლუბების 6-შეხვედრიან დუელში არის ფრე: 3-ჯერ მოიგეს ლივერპულის მოთამაშეებმა, ასევე 3-ჯერ პარკ დე პრენსის მკვიდრებმა.
რაც შეეხება დანაკლისს, ლუის ენრიკეს განკარგულებაში არ იქნებიან ფაბიან რუისი და ბრედლი ბარკოლა, მერსისაიდულ გუნდს კი ხსენებული ბრაზილიელი გოლკიპერის გარდა, კიდევ რამდენიმე ახალგაზრდა მოთამაშე ვერ დაეხმარება. საეჭვოა ალექსანდერ ისაკის გამოჩენაც.
აქვე დავამატებთ იმასაც, რომ "წითლებსა" და პარის სენ-ჟერმენს შორის გამარჯვებული ჩემპიონთა ლიგის ნახევარფინალში რეალ მადრიდსა და ბაიერნ მიუნხენს შორის ერთ-ერთს შეხვდება. საპასუხო დუელი გაიმართება 14 აპრილს, ჩვენი დროით 23:00 საათზე.
ბარსელონა V ატლეტიკო | 23:00
ამ გუნდების რიგით მეხუთე დაპირისპირება მიმდინარე სეზონში. ბარსელონამ ატლეტიკო დაამარცხა ლა ლიგის ორივე მატჩში, ასევე კოპა დელ რეიზეც, მაგრამ ფინალში გასვლისთვის აღნიშნული მოგება საკმარისი არ გამოდგა. საქმე ისაა, რომ მადრიდელებმა პირველ შეხვედრაში იმარჯვეს 4:0, კატალონიელებმა კი მოწინააღმდეგის კარი 3-ჯერ აიღეს.
ზოგადად კი ეს იქნება ამ გუნდების რიგით 251-ე დაპირისპირება და იქამდე, 115-ჯერ იმარჯვა "ბლაუგრანამ", 78-ჯერ "როხიბლანკოსმა", 57 შეხვედრა ფრედ დასრულდა. დიეგო სიმეონეს გუნდთან ჩატარებულ უკანასკნელ 7 თამაშში კამპ ნოუს მკვიდრებმა წააგეს მხოლოდ 1, ხსენებული დუელი ესპანეთის თასის 1/2 ფინალში.
რაც შეეხება დანაკლისს, ჰანსი ფლიკის განკარგულებაში არ იქნებიან ანდრეას კრისტენსენი, რაფინია ბელოლი და ფრენკი დე იონგი. ასევე საეჭვოა მარკ ბერნალის თამაშიც. მეტროპოლიტანოს მკვიდრებს ვერ დაეხმარებიან პაბლო ბარიოსი, ჯონი კარდოსო და როდრიგო მენდოსა. კითხვის ნიშნის ქვეშაა იან ობლაკისა და ხოსე მარია ხიმენესის თამაშიც.
ბოლოს შეგახსენებთ იმასაც, რომ ბარსელონასა და ატლეტიკოს შორის გამარჯვებული ჩემპიონთა ლიგის ნახევარფინალში ლონდონის არსენალსა და ლისაბონის სპორტინგს შორის ერთ-ერთს შეხვდება. საპასუხო დუელი კატალონიელებსა და მადრიდელებს შორის შედგება 14 აპრილს, 23:00 საათზე.
